ការប្រយុទ្ធដណ្តើមអំណាចគ្នានៅស៊ូដង់ សម្លាប់មនុស្សកាន់តែច្រើន រួមទាំងបុគ្គលិករបស់ UN

ការប្រយុទ្ធគ្នាយ៉ាងខ្លាំងក្លា បានកើតឡើងនៅក្នុងរដ្ឋធានី Khartoum របស់ប្រទេសស៊ូដង់ បើទោះបីជាមានការផ្អាករយៈពេលមួយម៉ោងកាលពីថ្ងៃអាទិត្យទី១៦ខែមេសា ដើម្បីដោះស្រាយតម្រូវការផ្នែកមនុស្សធម៌ រួមទាំងការជម្លៀសអ្នករងរបួសក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនស៊ីវិលជាង ៦០នាក់ត្រូវបានសម្លាប់នៅទូទាំងប្រទេស ដោយក្នុងនោះក៏មានបុគ្គលិកអង្គការសហប្រជាជាតិចំនួន៣នាក់ផងដែរ។ លើសពីនេះ មនុស្សជាង៦០០នាក់ ត្រូវរបួស។

កម្មវិធីស្បៀងអាហារពិភពលោក (WFP) បានឲ្យដឹងថា ខ្លួនបានផ្អាកប្រតិបត្តិការនៅក្នុងប្រទេសក្រីក្រមួយនេះ បន្ទាប់ពីការសម្លាប់កម្មកររបស់ខ្លួនចំនួន៣នាក់នៅរដ្ឋ North Darfur។

ការប្រយុទ្ធគ្នារវាងកងកម្លាំងប្រដាប់អាវុធដ៏មានឥទ្ធិពល និងកងកម្លាំងគាំទ្ររហ័ស (RSF) បានបង្កឲ្យមានការថ្កោលទោសជាអន្តរជាតិ និងក្តីព្រួយបារម្ភក្នុងតំបន់ រួមទាំងការបិទព្រំដែននៅប្រទេសជិតខាងគឺ អេហ្ស៊ីប និងឆាដផងដែរ។

ការប្រយុទ្ធគ្នាបានបន្តដល់យប់ជ្រៅថ្ងៃអាទិត្យ ខណៈប្រជាជនស៊ូដង់ បានពួនសំងំនៅក្នុងផ្ទះ ជាមួយនឹងការភ័យខ្លាចថា ជម្លោះអូសបន្លាយ អាចធ្វើឲ្យប្រទេសនេះ ធ្លាក់ចូលទៅក្នុងភាពវឹកវរកាន់តែជ្រៅ បំផ្លាញក្តីសង្ឃឹមយូរអង្វែងសម្រាប់ការផ្លាស់ប្តូរទៅកាន់លទ្ធិប្រជាធិបតេយ្យដែលដឹកនាំដោយស៊ីវិល។

គួរបញ្ជាក់ថា អំពើហិង្សាបានផ្ទុះឡើងនៅព្រឹកថ្ងៃសៅរ៍ បន្ទាប់ពីការតស៊ូអំណាចអស់រយៈពេលជាច្រើនសប្តាហ៍រវាងមេទ័ព Abdel Fattah al-Burhan និងអនុប្រធានរបស់គាត់គឺលោក Mohamed Hamdan Daglo៕

ប្រែសម្រួល៖ Vann Vann

ប្រភព៖ CNA, SKY

ចុចអាន៖ បាតុករជាង១០០នាក់ ត្រូវស្លាប់និងរបួស ក្នុងរដ្ឋប្រហារនៅ ស៊ូដង់