រុស្ស៊ី ​ធ្វើ​សមយុទ្ធ យន្តហោះ​ទម្លាក់​គ្រាប់​នុយក្លេអ៊ែរ​យ៉ាង​ភ្ញាក់ផ្អើល​  ​

កាលពីថ្ងៃអង្គារទី១៨ខែមេសា លោក វ្ល៉ាឌីមៀរ ពូទីន បានបញ្ជូនយន្តហោះទម្លាក់គ្រាប់បែកនុយក្លេអ៊ែរ Tu-95MS ចំនួន២គ្រឿងទៅកាន់សមុទ្រ Bering និង Okhotsk ក្នុងការបង្ហាញកម្លាំងថ្មីដ៏គួរឲ្យភ័យខ្លាច គំរាមលោកខាងលិច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមយុទ្ធដ៏គួរឲ្យភ្ញាក់ផ្អើលនេះ កើតឡើងចំពេលមានភាពតានតឹងកាន់តែខ្លាំងជាមួយប្រទេសលោកខាងលិច ជុំវិញសង្គ្រាមនៅអ៊ុយក្រែន។

ក្នុងអំឡុងការល្បាតដែនអាកាសរយៈពេលវែង គេបានឃើញយន្តហោះដឹកប្រេង Il-78 ចាក់ប្រេងឲ្យយន្តហោះវាយប្រហារនុយក្លេអ៊ែរ។

កងយន្តហោះ Tu-95 គឺជាផ្នែកមួយដ៏សំខាន់នៃកម្លាំងនុយក្លេអ៊ែររបស់រុស្ស៊ី ប៉ុន្តែយន្តហោះទាំងនោះ ក៏ត្រូវបានគេប្រើ ដើម្បីបាញ់មីស៊ីលមិនបំពាក់ក្បាលគ្រាប់បរមាណូ ដែលបណ្តាលឲ្យមានការបំផ្លិចបំផ្លាញទ្រង់ទ្រាយធំនៅក្នុងប្រទេសអ៊ុយក្រែន ផងដែរ។

ក្រៅពីសមយុទ្ធដែនអាកាសនេះ សមយុទ្ធមួយទៀតក៏កំពុងដំណើរការនៅភាគខាងកើតប្រទេសរុស្ស៊ីផងដែរ ដែលមានការចូលរួមពីនាវាមុជទឹក និងសមយុទ្ធបាញ់គ្រាប់ពិត។

លើសពីនេះ យន្តហោះវាយប្រហារនុយក្លេអ៊ែររបស់លោក ពូទីន ត្រូវបានគេរំពឹងថានឹង ធ្វើសមយុទ្ធបន្ថែមទៀត នាពេលថ្មីៗនេះ។

គួរបញ្ជាក់ថា សមយុទ្ធនេះកើតឡើងត្រឹមតែប៉ុន្មានថ្ងៃប៉ុណ្ណោះ បន្ទាប់ពីយន្តហោះព្យុះទីហ្វុងរបស់កងទ័ពអាកាសអង់គ្លេស បានស្ទាក់ចាប់យន្តហោះស៊ើបការណ៍រុស្ស៊ី និងយន្តហោះចម្បាំង២គ្រឿង ដែលហោះនៅជិតដែនអាកាស ណាតូ លើសមុទ្របាល់ទិក៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ រុស្ស៊ី ដាក់បញ្ចូល ប្រតិបត្តិការយោធានៅអ៊ុយក្រែន ក្នុងវិញ្ញាសាប្រឡងរបស់សិស្សសាលា