មើលវីដេអូនេះ ទើបដឹងថា សូរ្យគ្រាសកូនកាត់អស្ចារ្យកម្រិតណា

សូរ្យគ្រាសដ៏កម្រ បានធ្វើឲ្យមនុស្សរាប់ម៉ឺននាក់រំភើបចិត្ត ដោយពួកគេនាំគ្នាធ្វើដំណើរទៅកាន់តំបន់ដាច់ស្រយាលនៃប្រទេសអូស្ត្រាលី ដើម្បីទស្សនាទិដ្ឋភាពដ៏ល្អឥតខ្ចោះមួយនេះ។

ផ្ទៃមេឃលើតំបន់ Exmouth នៅភាគខាងលិចប្រទេសអូស្ត្រាលី បានប្រែជាងងឹតរយៈពេលប្រហែល៦០វិនាទីនៅថ្ងៃព្រហស្បតិ៍ទី២០ខែមេសា។

សូរ្យគ្រាសនេះ គឺជាសូរ្យគ្រាសកូនកាត់ដ៏កម្រ ដែលកើតឡើងត្រឹមតែពីរបីដងប៉ុណ្ណោះក្នុងមួយសតវត្សរ៍។

ក្រៅពីប្រទេសអូស្រ្តាលី សូរ្យគ្រាសនេះក៏អាចមើលឃើញនៅទូទាំងផ្នែកផ្សេងទៀត នៃតំបន់អាស៊ីប៉ាស៊ីហ្វិកផងដែរ។ ប្រជាជនដែលរស់នៅក្នុងប្រទេសអូស្ត្រាលីភាគខាងលិច ទីម័រខាងកើត និងប៉ាពួខាងលិច អាចមើលឃើញទិដ្ឋភាពល្អបំផុត។

សូរ្យគ្រាសនេះ បានចាប់ផ្តើមនៅមហាសមុទ្រឥណ្ឌានាពេលថ្ងៃរះ ហើយបញ្ចប់ទៅវិញនៅពេលថ្ងៃលិចក្នុងមហាសមុទ្រប៉ាស៊ីហ្វិក ខណៈអ្នកសង្កេតនៅចំនុចផ្សេងៗតាមផ្លូវនៃសូរ្យគ្រាសនេះ អាចមើលឃើញពីដំណាក់កាលខុសៗគ្នារបស់សូរ្យគ្រាស។

អ្នកខ្លះឃើញសូរ្យគ្រាសទាំងស្រុង អ្នកខ្លះឃើញសូរ្យគ្រាសរាងជារង្វង់ ហើយអ្នកខ្លះឃើញរាងជាចិញ្ចៀន។

គួរបញ្ជាក់ថា សូរ្យគ្រាសកូនកាត់ចុងក្រោយគឺកើតឡើងនៅខែវិច្ឆិកាឆ្នាំ២០១៣ ហើយអង្គការណាសា រំពឹងថាសូរ្យគ្រាសកូនកាត់លើកក្រោយ នឹងកើតឡើងនៅឆ្នាំ២០៣១៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ មានតែប្រទេសអាស៊ាន ៣ ប៉ុណ្ណោះដែលអាចមើលឃើញព្រឹត្តិការណ៍ “សូរ្យគ្រាសកូនកាត់” ដ៏កម្រថ្ងៃនេះ