វៀតណាម ត្រៀមរួចជាស្រេច ដើម្បីការពារពលរដ្ឋរបស់ខ្លួននៅ ស៊ូដង់

ប្រទេសវៀតណាម បាននិយាយកាលពីថ្ងៃព្រហស្បតិ៍ទី២០ខែមេសាថា ខ្លួនកំពុងតាមដានស្ថានការណ៍នៅក្នុងប្រទេសស៊ូដង់យ៉ាងដិតដល់ ហើយត្រៀមជាស្រេចដើម្បីការពារពលរដ្ឋរបស់ខ្លួននៅក្នុងប្រទេសនេះ ប្រសិនបើចាំបាច់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងការបរទេស លោក Doan Khac Viet បាននិយាយនៅក្នុងសន្និសីទកាសែតមួយថា មានពលរដ្ឋវៀតណាមកូនកាត់អូស្ត្រាលីម្នាក់រស់នៅក្នុងទីក្រុង ខាទុំ រួមជាមួយនឹងជនជាតិវៀតណាម១៦នាក់ផ្សេងទៀត នៅលើកប៉ាល់មួយគ្រឿង នៅឯកំពង់ផែស៊ូដង់។

លោកបន្ថែមថា បច្ចុប្បន្នប្រជាពលរដ្ឋទាំងអស់មានសុវត្ថិភាព ហើយវៀតណាមនឹងបន្តតាមដានស្ថានការណ៍គ្រប់ពេលវេលា។

គួរបញ្ជាក់ថា ជម្លោះរវាងកងទ័ពស៊ូដង់ក្រោមការដឹកនាំរបស់លោកឧត្តមសេនីយ៍ Abdel Fattah al-Burhan និងកងកម្លាំងគាំទ្ររហ័ស (RSF) របស់ឧត្តមសេនីយ៍ Mohamed Hamdan Dagalo បានផ្ទុះឡើងកាលពីថ្ងៃទី១៥ខែមេសា បន្ទាប់ពីភាពតានតឹងអស់រយៈពេលជាច្រើនសប្តាហ៍ទាក់ទងនឹងការដាក់បញ្ចូល RSF ទៅក្នុងជួរកងទ័ព។

មនុស្សជាង២៧០នាក់បានស្លាប់ និងជាង១៨០០នាក់រងរបួស ចំពេលមានជម្លោះ ថ្វីបើតួលេខជាក់ស្តែងអាចខ្ពស់ជាងនេះ ដោយសារមនុស្សជាច្រើនមិនអាចទៅដល់មន្ទីរពេទ្យទាន់ពេលក៏ដោយ។

ស្របពេលជាមួយគ្នានោះ អង្គការសហប្រជាជាតិ និងអង្គការអន្តរជាតិផ្សេងទៀត បានអំពាវនាវឲ្យបញ្ចប់ជម្លោះនេះ ជាបន្ទាន់៕

ប្រែសម្រួល៖ Vann Vann

ប្រភព៖ VN Express

ចុចអាន៖ ប្រជាជនស៊ូដង់ ភៀសខ្លួនចេញពីរដ្ឋធានី ខណៈការប្រយុទ្ធ មិនថមថយ