កងកម្លាំងគាំទ្ររហ័សស៊ូដង់ ប្រកាសបើកអាកាសយានដ្ឋាន សម្រាប់ការជម្លៀស

កងកម្លាំងគាំទ្ររហ័សស៊ូដង់ (RSF) បានប្រកាសត្រៀមខ្លួនរួចជាស្រេច ក្នុងការបើកអាកាសយានដ្ឋាន ដើម្បីអនុញ្ញាតឲ្យមានការជម្លៀសពលរដ្ឋបរទេសចេញពីប្រទេសស៊ូដង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

RSF បន្ថែមថា ពួកគេបានរៀបចំរួចរាល់អស់ហើយ សម្រាប់កិច្ចសហប្រតិបត្តិការ បង្កើតឱកាសឲ្យអ្នកតំណាង និងបេសកកម្មការទូតបរទេស  ចាកចេញពីប្រទេសស៊ូដង់ដោយសុវត្ថិភាព។

RSF បាននិយាយនៅលើ Twitter កាលពីថ្ងៃសុក្រទី២១ខែមេសាថា “កងកម្លាំងគាំទ្ររហ័សប្រកាសការត្រៀមខ្លួន ដើម្បីបើកផ្នែកខ្លះនៃអាកាសយានដ្ឋានទាំងអស់ក្នុងប្រទេសស៊ូដង់សម្រាប់ចរាចរណ៍ផ្លូវអាកាស ដូច្នេះរដ្ឋជាមិត្ត និងបងប្អូនដែលមានបំណងជម្លៀសពលរដ្ឋរបស់ពួកគេ អាចធ្វើដូច្នេះបានដោយសុវត្ថិភាព”។

គួរបញ្ជាក់ជាថ្មី កាលពីថ្ងៃសៅរ៍សប្តាហ៍មុន ការប៉ះទង្គិចគ្នាដោយហិង្សារវាងកងកម្លាំងប្រដាប់អាវុធស៊ូដង់ និង RSF បានផ្ទុះឡើង ក្នុងទីក្រុង ខាទុំ។ កងកម្លាំងរដ្ឋាភិបាលបានចោទប្រកាន់ RSF ពីបទបះបោរ ហើយបានបើកការវាយប្រហារតាមអាកាសប្រឆាំងនឹងមូលដ្ឋានរបស់ពួកគេ។

រដ្ឋមន្ត្រីសុខាភិបាលស៊ូដង់លោក Haitham Mohamed Ibrahim បានបញ្ជាក់ថា មនុស្សប្រហែល៦០នាក់បានស្លាប់ និងជាង២០០នាក់រងរបួស នៅថ្ងៃដំបូងនៃពិធីបុណ្យមូស្លីម Eid al-Fitr ហើយគិតត្រឹមពេលនេះ មនុស្សប្រហែល៦០០នាក់បានស្លាប់ និង៣៥០០នាក់រងរបួសក្នុងអំឡុងពេលជម្លោះរយៈពេលជិតមួយសប្តាហ៍៕

ប្រែសម្រួល៖ Vann Vann

ប្រភព៖ Sputnik

ចុចអាន៖ ប្រជាជនស៊ូដង់ ភៀសខ្លួនចេញពីរដ្ឋធានី ខណៈការប្រយុទ្ធ មិនថមថយ