អ៊ុយក្រែន ឲ្យសម្ព័ន្ធមិត្តឆ្លងកាត់ “បន្ទាត់ក្រហម” ក្នុងបញ្ហាផ្គត់ផ្គង់អាវុធ

អនុរដ្ឋមន្ត្រីការបរទេសអ៊ុយក្រែន លោក Andrij Melnyk បាននិយាយកាលពីថ្ងៃសៅរ៍ថា រដ្ឋាភិបាលទីក្រុងកៀវត្រូវការបង្កើនជំនួយយោធាពីសម្ព័ន្ធមិត្តចំនួន ១០ ដង ដូច្នេះហើយជំរុញឲ្យដៃគូអន្តរជាតិត្រូវតែឆ្លងកាត់ “បន្ទាត់ក្រហម” ទាំងអស់នៅក្នុងបញ្ហាការផ្គត់ផ្គង់អាវុធ ។

លោក Melnyk បាននិយាយនៅលើបណ្ដាញ Twitter ថា “យើងសូមអរគុណដល់សម្ព័ន្ធមិត្តរបស់យើងសម្រាប់ការផ្ដល់ជំនួយយោធារបស់ពួកគេ ប៉ុន្តែវាមិនទាន់គ្រប់គ្រាន់នៅឡើយទេ ព្រោះអ៊ុយក្រែនត្រូវការជំនួយបែបនេះ ១០ ដងបន្ថែមទៀតដើម្បីបញ្ចប់សង្គ្រាមលុកលុយរបស់រុស្ស៊ីនៅឆ្នាំនេះ ដូច្នេះយើងអំពាវនាវឲ្យដៃគូរបស់យើងឆ្លងកាត់បន្ទាត់ក្រហមទាំងអស់” ។

ស្របពេលជាមួយគ្នានេះ លោកក៏បានជំរុញឲ្យសម្ព័ន្ធមិត្តបែងចែក ១ ភាគរយនៃផលិតផលក្នុងស្រុក (GDP) របស់ពួកគេ សម្រាប់ការផ្គត់ផ្គង់អាវុធដល់អ៊ុយក្រែន ។

ប្រទេសលោកខាងលិចបាននឹងកំពុងផ្គត់ផ្គង់ឲ្យរដ្ឋាភិបាលទីក្រុងកៀវ នូវប្រព័ន្ធសព្វាវុធជាច្រើនប្រភេទ រួមទាំងកាំជ្រួចមីស៊ីលការពារដែនអាកាស ប្រព័ន្ធបាញ់គ្រាប់រ៉ុកកែតច្រើនគ្រាប់ រថក្រោះ កាំភ្លើងធំបាញ់ស្វ័យប្រវត្តិ និងកាំភ្លើងបាញ់ប្រឆាំងយន្តហោះ ចាប់តាំងពីផ្ទុះប្រតិបត្តិការសឹករបស់រុស្ស៊ីលើអ៊ុយក្រែនជាង ១ ឆ្នាំមកនេះ ។

ប៉ុន្តែទោះជាយ៉ាងណា វិមានក្រឹមឡាំងបានព្រមានម្តងហើយម្តងទៀតប្រឆាំងនឹងការបញ្ជូនអាវុធបន្ថែមទៀតទៅក្រុងកៀវ ហើយចាត់ទុកសកម្មភាពទាំងនោះថាមិនមែនចង់បញ្ចប់សង្គ្រាមនោះទេ គឺមានតែអូសបន្លាយពេលបន្ថែមទៀត ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ប៉ូលិសរកឃើញតម្រុយថ្មីបន្ថែមទៀតរបស់ជនសង្ស័យប៉ុនប៉ងធ្វើឃាតនាយករដ្ឋមន្ត្រី ជប៉ុន