ធ្លាយព័ត៌មានថា អាមេរិក មានផែនការសម្ងាត់សម្លាប់មេក្រុមហ៊ុនទាហានស៊ីឈ្នួល រុស្ស៊ី

កាសែត Washington Post បានរាយការណ៍កាលពីថ្ងៃចន្ទទី២៤ខែមេសាថា ក្រុមមន្ត្រីសហរដ្ឋអាមេរិក បានពិចារណាសម្លាប់មន្ត្រីកំពូលនៃក្រុមហ៊ុនយោធាឯកជនរុស្ស៊ី Wagner ដើម្បីទប់ស្កាត់ការកើនឡើងនូវឥទ្ធិពលរបស់ក្រុមហ៊ុននេះនៅក្នុងទ្វីបអាហ្រ្វិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែតខាងលើរាយការណ៍ថា ឯកសារដែលទម្លាយដោយឆ្មាំអាមេរិកម្នាក់ គឺមានរាយបញ្ជីសេណារីយ៉ូជាច្រើនសម្រាប់កិច្ចខិតខំប្រឹងប្រែងរបស់សហរដ្ឋអាមេរិកនិងសម្ព័ន្ធមិត្ត ប្រឆាំងនឹងក្រុមហ៊ុនទាហានស៊ីឈ្នួល Wagner។ ឯកសារនេះអះអាងថា សហរដ្ឋអាមេរិកក៏ពិចារណា ផ្តល់ព័ត៌មានដើម្បីជួយអ៊ុយក្រែនសម្លាប់មេបញ្ជាការ Wagner នៅអាហ្វ្រិកផងដែរ។

លើសពីនេះ ឯកសារទាំងនោះ មានព័ស្តុតាងបង្ហាញថា CIA, មន្ទីរបញ្ចកោណ និងទីភ្នាក់ងារសហរដ្ឋអាមេរិកផ្សេងទៀត បានធ្វើឲ្យក្រុមហ៊ុន Wagner ជួបប្រទះឧបសគ្គធំៗក្នុងរយៈពេលប្រាំមួយឆ្នាំចុងក្រោយមកនេះ។ ឯកសារក៏បានលើកឡើងពីការវាយប្រហារដោយជោគជ័យ នៅក្នុងប្រទេសលីប៊ី ដែលបានបំផ្លាញយន្តហោះដឹកជញ្ជូនរបស់ក្រុមហ៊ុន Wagner ផងដែរ។

គួរបញ្ជាក់ថា ប្រទេសលោកខាងលិចបានចោទប្រកាន់ក្រុមហ៊ុន Wagner ជាយូរមកហើយថាបានពង្រីកឥទ្ធិពលអាក្រក់នៅក្នុងទ្វីបអាហ្វ្រិក ខណៈប្រធានរបស់ខ្លួន គឺអ្នកជំនួញ Yevgeny Prigozhin បានចាត់ទុកសេវាកម្មដែលផ្តល់ដោយបុគ្គលិករបស់គាត់ ថាជាបំណងប្រាថ្នាប្រឆាំងនឹងអាណានិគមនិយមនៅប្រទេសអាហ្វ្រិក។

មិនត្រឹមប៉ុណ្ណឹង, ឯកសារលេចធ្លាយទីពីរ ដែលត្រូវបានចេញផ្សាយដោយកាសែតខាងលើនៅថ្ងៃអង្គារទី ២៥ខែមេសា បានចោទប្រកាន់ថា សេវាចារកម្មយោធារបស់អ៊ុយក្រែន (GUR) និងប្រធានរបស់ខ្លួនគឺលោក Kirill Budanov បានរៀបចំផែនការវាយប្រហារលើមន្រ្តី Wagner នៅក្នុងប្រទេសម៉ាលីទៀតផង។

រុស្ស៊ីបានចោទប្រកាន់ GUR ថាជាមេខ្លោងបើកការវាយប្រហារលើស្ពាន គ្រីមៀ កាលពីខែតុលាឆ្នាំមុន ដែលកាលនោះ ការផ្ទុះដ៏ខ្លាំងមួយបានសម្លាប់អ្នកបើកបររថយន្តដឹកទំនិញ។

ទីក្រុងមូស្គូក៏បានស្តីបន្ទោសសេវាពិសេសរបស់អ៊ុយក្រែន ចំពោះការធ្វើឃាតអ្នកកាសែត Darya Dugina ក្នុងខែសីហា ឆ្នាំ ២០២២ និងអ្នកសរសេរប្លុកយោធា Vladlen Tatarsky កាលពីដើមខែនេះផងដែរ៕

ប្រែសម្រួល៖ Vann Vann

ប្រភព៖ RT

ចុចអាន៖ យោធាអាមេរិកចោទថា រុស្ស៊ីកំពុងបញ្ជូនសម្ភារៈយោធាទៅឲ្យទាហានស៊ីឈ្នួលក្នុងប្រទេស លីប៊ី