ខ្លះៗពីប្រទេស ស៊ូដង់ ដែលកំពុងផ្ទុះការប្រយុទ្ធគ្នា

បច្ចុប្បន្នប្រទេសស៊ូដង់កំពុងតែមានការប្រយុទ្ធគ្នាយ៉ាងស្វិតស្វាញ ដោយសារតែការខ្វែងគំនិតគ្នារវាងមេបញ្ជាការកងទ័ពលោក Abdel Fattah al-Burhan ដែលជាប្រធានក្រុមប្រឹក្សាអធិបតេយ្យ ជាមួយនឹងប្រធានកងកម្លាំងគាំទ្ររហ័ស (RSF) លោក Mohamed Hamdan Dagal ដែលឈានដល់មានការសម្លាប់ជនស៊ីវិលជាច្រើនរយនាក់ ។

ពាក់ព័ន្ធនឹងភូមិសាស្ត្រវិញ ស៊ូដង់ជាប្រទេសសាធារណរដ្ឋដែលស្ថិតនៅ​ក្នុងភាគឦសានទ្វីបអាហ្រិ្វក ​ដោយមានទីក្រុង ខាទុំ ជារដ្ឋធានីសំខាន់ ហើយមានផ្ទៃដីប្រមាណ ១,៨៨៦,០៦៨ គីឡូម៉ែត្រការ៉េ ។

ប្រទេសនេះ​ មានព្រំប្រទល់​ខាងជើង​ជាប់​អេហ្ស៊ីប ខាងកើត​ជាប់​សមុទ្រ​ក្រហម ប្រទេសអេរីទ្រា និង​អេត្យូពី ខណៈខាងត្បូង​ជាប់​ស៊ូដង់​ខាងត្បូង ខាងលិច​ជាប់​សាធារណរដ្ឋ​អាហ្រ្វិកកណ្តាល និង​ឆាដ ចំណែកខាងជើងជាប់​លីប៊ី ។

ជាមួយផ្ទៃដីដ៏ធំនេះ​ ស៊ូដង់ ជាប្រទេសធំទី ៣ របស់ទ្វីបអាហ្រ្វិក និងលំដាប់លេខ ១៥ ​លើពិភពលោក ហើយគិតត្រឹមឆ្នាំ​២០២២ ប្រទេសទ្វីបអាហ្វ្រិកមួយនេះ មានប្រជាជនប្រមាណជាង ៤៥.៧ លាននាក់ ។

ឈ្មោះស៊ូដង់ គឺមកពីពាក្យអារ៉ាប់ bilād al-sūdān មានន័យថា ដែនដីនៃជនជាតិស្បែកខ្មៅ ដែលអ្នកភូមិសាស្ត្រអារ៉ាប់មជ្ឈិមសម័យនោះ សំដៅទៅលើបណ្តាប្រទេសអាហ្រ្វិកដែលបានចាប់ផ្ដើមតាំងទីលំនៅ នៅគែមខាងត្បូងនៃតំបន់សាហារ៉ា ។

ចំណែកប្រជាពលរដ្ឋប្រទេសនេះ​ និយាយភាសាអារ៉ាប់ ភាសាអង់គ្លេស ភាសា Nubian និងភាសាផ្សេងៗទៀត ប៉ុន្តែបានយកភាសា​អង់គ្លេស ជាភាសាផ្លូវការ ។ ហើយចំពោះសាសនាវិញ​ ប្រជាជនប្រទេសនេះគោរពសាសនាឥស្លាម សាសនាគ្រឹស្ត និងជំនឿប្រពៃណីផងដែរ ។

ទោះបីជាយ៉ាងណា ប្រទេសមួយនេះធ្លាប់មានជម្លោះជាច្រើន​ដងរួចហើយមកផងដែរ ​រួមមានការឈ្លានពាន និងការតស៊ូរបស់បរទេស ភាពតានតឹងជនជាតិភាគតិច ជម្លោះសាសនា និងការប្រកួតប្រជែងលើធនធានជាដើម ហើយចាប់តាំងពីទទួលបានឯករាជ្យនៅឆ្នាំ ១៩៥៦ មក ស៊ូដង់មានរដ្ឋប្រហារយោធាច្រើនជាង ១៥ ដង ដែលភាគច្រើនគ្រប់គ្រងដោយយោធា ។

ដោយឡែកពាក់ព័ន្ធនឹងការប៉ះទង្គិចគ្នារវាងកងទ័ពស៊ូដង់ និងកងកម្លាំងគាំទ្ររហ័ស (RSF) ដែលបានកើតឡើងកាលពីពាក់ណ្ដាលខែមេសាកន្លងមក និងបានអូសបន្លាយពេលដល់សប្ដាហ៍ទី ២ ហើយនោះ បានសម្លាប់ជនស៊ីវិលជាង ៤០០ នាក់ និងប្រហែល ៣,៧០០ នាក់រងរបួស ៕

ប្រែសម្រួល ៖​ នាង រតនៈ

ប្រភព ៖ Wikipedia

ចុចអាន៖ ភាគីជម្លោះនៅស៊ូដង់ យល់ព្រមបទឈប់បាញ់រយៈពេល ៧២ ម៉ោង