ទីក្រុងមូស្គូព្រមានថា រុស្ស៊ី​ កំពុង​ខិតកាន់តែ​ជិត ទៅនឹងជម្លោះ​នុយក្លេអ៊ែរ​ជាមួយ​អាមេរិក

ទីក្រុងមូស្គូព្រមានថា រុស្ស៊ីកំពុងខិតទៅជិតជម្លោះនុយក្លេអ៊ែរជាមួយសហរដ្ឋអាមេរិកហើយ ដោយសារតែការគាំទ្ររបស់ទីក្រុងវ៉ាស៊ីនតោន ចំពោះអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Vladimir Yermakov ប្រធានផ្នែកមិនរីកសាយភាយនុយក្លេអ៊ែររបស់ក្រសួងការបរទេសរុស្ស៊ី បានប្រាប់ទីភ្នាក់ងារសារព័ត៌មាន TASS ថា ទីក្រុងវ៉ាស៊ីនតោន កំពុងបង្កើនហានិភ័យតាមរយៈទង្វើរបស់ខ្លួនជាមួយវិមានក្រឹមឡាំង។

លោកនិយាយថា ហានិភ័យនៃការប្រឈមមុខដាក់គ្នាខាងយោធាដោយផ្ទាល់ រវាងមហាអំណាចនុយក្លេអ៊ែរទាំងពីរ កំពុងកើនឡើងជាលំដាប់។ លោកថែមទាំងលើកឡើងផងដែរថា រុស្ស៊ីអាចនឹងដកខ្លួនចេញពីសន្ធិសញ្ញាមីស៊ីលនុយក្លេអ៊ែររយៈចម្ងាយខ្លី និងមធ្យម។

ចាប់តាំងពីលោក វ្ល៉ាឌីមៀរ ពូទីន បើកការវាយលុកលើអ៊ុយក្រែនកាលពី១៤ខែមុនមក, ទីក្រុងមូស្គូតែងតែចោទប្រកាន់ប្រឆាំងសហរដ្ឋអាមេរិក និងអ្វីដែលខ្លួនហៅថា “បក្សពួកលោកខាងលិច” ចំពោះការបង្កើនហានិភ័យនៃសង្គ្រាមនុយក្លេអ៊ែរ។

លោក Yermakov លើកឡើងថា “ប្រសិនបើសហរដ្ឋអាមេរិក នៅតែបន្តធ្វើរឿងឲ្យមានការប្រឈមមុខដាក់គ្នាជាមួយរុស្ស៊ីដូចបច្ចុប្បន្នស្របពេលភាពតានតឹងកើនឡើងឥតឈប់ឈរ ជិតឈានដល់ការធ្លាក់ចូលទៅក្នុងជម្លោះប្រដាប់អាវុធដោយផ្ទាល់នោះ, ជោគវាសនានៃសន្ធិសញ្ញាអាវុធនុយក្លេអ៊ែរ New START នឹងត្រូវបាត់បង់”។

គួរបញ្ជាក់ជាថ្មី សហរដ្ឋអាមេរិក បានប្រាប់រុស្ស៊ីកាលពីខែមីនាថា ខ្លួននឹងឈប់ដោះដូរទិន្នន័យមួយចំនួនស្តីពីកងកម្លាំងនុយក្លេអ៊ែររបស់ខ្លួន បន្ទាប់ទីក្រុងមូស្គូបដិសេធធ្វើដូច្នេះដែរ។

សន្ធិសញ្ញានេះ តម្រូវឲ្យរុស្ស៊ីនិងអាមេរិក ប្តេជ្ញាចិត្តរក្សាទំនាក់ទំនងជាប្រចាំ អំពីស្ថានភាពនៃឃ្លាំងអាវុធនុយក្លេអ៊ែររបស់ពួកគេ, អនុញ្ញាតឲ្យមានការត្រួតពិនិត្យជាប្រចាំនៅនឹងកន្លែង និងគោរពតាមការកំណត់លើចំនួនក្បាលគ្រាប់ដែលដាក់ពង្រាយ និងមិនដាក់ពង្រាយ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ប្រមុខ UN៖ វោហាសាស្ត្រគ្រោះថ្នាក់ កំពុងជំរុញឲ្យមានភាពតានតឹង នុយក្លេអ៊ែរ