ហេតុអ្វីបានជា ចិន បង្កើនទុនបម្រុងមាសរបស់ខ្លួន?

កាសែតដែលមានមូលដ្ឋាននៅទីក្រុងញូវយ៉កបានរាយការណ៍ថា ប្រទេសចិនកំពុងបង្កើនទុនបម្រុងមាសរបស់ខ្លួនក្នុងរយៈពេល ៥ ខែជាប់ៗគ្នា ដោយសារតែរដ្ឋាភិបាទីក្រុងប៉េកាំងកំពុងរៀបចំទប់ទល់ ក៏ដូចជាប្រឆាំងនឹងការដាក់ទណ្ឌកម្មនាពេលអនាគត ពីសំណាក់បរទេសមកលើសាធារណរដ្ឋប្រជាមានិតចិន ។

លោក Sun Xiaoji អ្នកជំនាញផ្នែកហិរញ្ញវត្ថុចិនបាននិយាយថា ធនាគារកណ្តាលរបស់ប្រទេសចិនកំពុងបង្កើនការកាន់កាប់មាសរបស់ខ្លួនយ៉ាងសកម្ម ដោយសារតែចិនបានដកចេញនូវសេណារីយ៉ូនៃប្រព័ន្ធទូទាត់ប្រាក់ដុល្លារអាមេរិកជាសកល ។

លោក Sun បានអះអាងថា “បក្សកុម្មុយនិស្តចិន (CCP) កំពុងប្រកួតប្រជែងយ៉ាងសកម្មជាមួយសហរដ្ឋអាមេរិក និងដកប្រាក់ដុល្លារចេញពីការទូទាត់ ប៉ុន្តែហេតុផលពិតប្រាកដនោះគឺ ចិនបានដឹងខ្លួនឯងហើយថា មិនយូរមិនឆាប់ នឹងត្រូវបានដាក់ទណ្ឌកម្មដោយសហរដ្ឋអាមេរិក ។ ដូច្នេះហើយទើប ចិនស្វែងរកវិធីជំនួសប្រាក់ដុល្លារអាមេរិក ហើយជម្រើសតែមួយគត់គឺមាសនេះឯង” ។

អ្នកជំនាញរូបនេះបានបញ្ជាក់ទៀតថា ហេតុផលមួយទៀតសម្រាប់ការលែងទូទាត់ប្រាក់ដុល្លារ ក្នុងចំណោមបណ្ដាប្រទេស BRICS ដែលចិនក៏ជាសមាជិកដែលនោះ មិនមែនដោយសារតែប្រទេសចិន និងរុស្ស៊ីបានសម្រេចចិត្តលែងប្រើប្រាស់ប្រាក់ដុល្លារអាមេរិកនោះទេ ។

លោកបានអះអាងថា បញ្ហានេះគឺព្រោះតែរលកនៃសកលភាវូបនីយកម្មនាពេលថ្មីៗនេះបានឈានដល់ទីបញ្ចប់ ហើយពិភពលោកហៀបនឹងឈានចូលដំណាក់កាលនៃការអភិវឌ្ឍន៍ក្នុងតំបន់ ក៏ដូចជាការប្រឈមមុខដាក់គ្នាជាលក្ខណៈអន្តរតំបន់ជាដើម ។

គួរបញ្ជាក់ថា ការកត់សម្គាល់នេះកើតឡើងតែប៉ុន្មានសប្តាហ៍ប៉ុណ្ណោះ បន្ទាប់ពីធនាគារជាតិចិនបានបង្កើនទុនបម្រុងមាសរបស់ខ្លួនប្រហែល ១៨ តោន បន្ទាប់ពីមានចន្លោះខ្វះខាតដែលបានកើតឡើងនៅខែកញ្ញា ឆ្នាំ ២០១៩ ដល់ខែតុលា ឆ្នាំ ២០២២ ខណៈបច្ចុប្បន្នស្តុកមាសសរុបរបស់ប្រទេសចិន មានចំនួនប្រហែល ២,០៦៨ តោន បន្ទាប់ពីកើនឡើងប្រហែល ១០២ តោនក្នុងរយៈពេល ៤ ខែ នៅមុនខែមីនាឆ្នាំនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ តើលោក ស៊ី និងលោក ហ្សេលេនស្គី និយាយអ្វីខ្លះ ក្នុងកិច្ចសន្ទនាលើកដំបូង ចាប់តាំងពីរុស្ស៊ី វាយលុក អ៊ុយក្រែន?