ព័ត៌មានអន្ដរជាតិ

បក្សភឿថៃរបស់កូនស្រីលោក ថាក់ស៊ីន នឹងដំឡើងថ្លៃកៅស៊ូជួយកសិករ ពេលជាប់ឆ្នោត

បានផុស

២ years មុន

នៅ

ថ្ងៃសុក្រ ២៨ មេសា ២០២៣

ដោយ

គណបក្សភឿថៃរបស់កូនស្រីលោក ថាក់ស៊ីន ស៊ីណាវ៉ាត់ត្រា បានអះអាងជាថ្មីនូវផែនការរបស់បក្សក្នុងការដំឡើងថ្លៃកៅស៊ូ នៅពេលដែលសមាជិករបស់បក្សបានចុះជួបកសិករនៅស្រុក Thung Song នៃខេត្ត Nakhon Si Thammarat កាលពីថ្ងៃព្រហស្បតិ៍ ។

***លោក Srettha Thavisin (ឆ្វេង) និងលោកស្រី Paetongtarn Sinawatra (កណ្ដាល)***

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាជិកជាន់ខ្ពស់មួយរូបរបស់គណបក្សគឺលោក Srettha Thavisin បាននិយាយថា គណបក្សកំពុងកែសម្រួលគោលនយោបាយក្នុងយុទ្ធនាការឃោសនាអ្នកបោះឆ្នោតនៅខេត្តភាគខាងត្បូងរបស់ប្រទេស ជាពិសេសផ្ដោតលើការដំឡើងថ្លៃកៅស៊ូឲ្យកាន់តែមានសក្ដានុពល ។

លោក Srettha បានបញ្ជាក់ទៀតថា នៅពេលដែលគណបក្សភឿថៃឡើងកាន់អំណាច គណបក្សនឹងព្យាយាមចរចាជាមួយអ្នកផលិតកៅស៊ូធំៗរបស់ពិភពលោក ដើម្បីរក្សា និងដំឡើងតម្លៃកៅស៊ូឲ្យកាន់តែខ្ពស់ ដោយសារការលក់កៅស៊ូ ជាប្រភពចំណូលតែមួយគត់សម្រាប់គ្រួសារភាគច្រើនក្នុងស្រុក Thung Song ហើយព្រោះតែតម្លៃកៅស៊ូចុះថោកនេះហើយ ទើបធ្វើឲ្យពួកគេមិនអាចរកដោះស្រាយជីវភាពបាន ។

លោកបានសង្កត់ធ្ងន់ថា ទោះបីជាមានការផ្គត់ផ្គង់កៅស៊ូគ្រប់គ្រាន់ក៏ដោយ ក៏ការតភ្ជាប់ផ្លូវថ្នល់ និងឃ្លាំងជាច្រើនទៀត ត្រូវតែបង្កើតឡើងបន្ថែមសម្រាប់ការចែកចាយទំនិញប្រកបដោយប្រសិទ្ធភាព ហើយការនាំចេញរបស់ប្រទេសត្រូវតែត្រូវបានផ្សព្វផ្សាយទៅក្រៅប្រទេស ដើម្បីជួយបើកទីផ្សារថ្មីដូចជា នៅមជ្ឈិមបូព៌ា និងអាហ្វ្រិកជាដើម ។

ជាចុងក្រោយលោក Srettha បាននិយាយថា ទោះបីជាគណបក្សមិនដែលឈ្នះអាសនៈនៅភាគខាងត្បូងពេលខ្លួនកាន់អំណាចក៏ដោយ ក៏រដ្ឋបាលដឹកនាំដោយគណបក្សភឿថៃបានប្តេជ្ញាថានឹងធ្វើការដើម្បីបម្រើផលប្រយោជន៍ក្នុងតំបន់ និងប្រជាជនរបស់ខ្លួន ៕