លោក Shoigu ៖ អាមេរិក ចាក់រុកប្រទេសផ្សេងទៀតឲ្យប្រឈមមុខ​ផ្នែកយោធាជាមួយ រុស្ស៊ី និងចិន

រដ្ឋមន្ត្រីការពារជាតិរុស្ស៊ី លោក Sergei Shoigu បាននិយាយកាលពីថ្ងៃសុក្រថា សហរដ្ឋអាមេរិក និងសម្ព័ន្ធមិត្តបានចាក់រុកប្រទេសផ្សេងទៀតឲ្យប្រឈមមុខផ្នែកយោធាជាមួយរុស្ស៊ី និងចិន ។

ថ្លែងនៅក្នុងកិច្ចប្រជុំកំពូលនៃរដ្ឋមន្ត្រីការពារជាតិ មកពីប្រទេសសមាជិកនៃអង្គការកិច្ចសហប្រតិបត្តិការសៀងហៃ (SCO) លោក Shoigu លើកឡើងថា អរិភាពក្នុងប្រទេសអ៊ុយក្រែន បញ្ជាក់យ៉ាងច្បាស់ពីការចាក់រុករបស់លោកខាងលិច ដែលដឹកនាំដោយសហរដ្ឋអាមេរិក ដើម្បីធ្វើឲ្យប្រទេសផ្សេងទៀតជាប់ពាក់ព័ន្ធផ្នែកយោធាជាមួយទីក្រុងមូស្គូ និងទីក្រុងប៉េកាំង ។

លោក Shoigu បានពន្យល់ថា “គោលដៅពិតប្រាកដរបស់លោកខាងលិចក្នុងជម្លោះអ៊ុយក្រែន គឺជាយុទ្ធសាស្ត្រកម្ចាត់រុស្ស៊ីដើម្បីគំរាមកំហែងចិន ហើយរក្សាជំហរផ្តាច់មុខរបស់ខ្លួននៅក្នុងពិភពលោក” ។

រដ្ឋមន្ត្រីការពារជាតិរុស្ស៊ីរូបនេះបញ្ជាក់ទៀតថា សមត្ថភាពប្រយុទ្ធរបស់ប្រទេសសម្ព័ន្ធអាត្លង់ទិកខាងជើងស្ទើរតែទាំងអស់ ត្រូវបានដាក់ពង្រាយប្រឆាំងនឹងប្រទេសរុស្ស៊ី ជាពិសេសអំឡុងពេលផ្ទុះប្រតិបត្តិការសឹករបស់កងកម្លាំងទីក្រុងមូស្គូនៅក្នុងប្រទេសអ៊ុយក្រែន ។

ជាចុងក្រោយលោក Shoigu អះអាងថា “អ្វីដែលកាន់តែបង្ហាញយ៉ាងជាក់ច្បាស់ទៀតនោះ គឺការដាក់ទណ្ឌកម្មទ្រង់ទ្រាយធំភ្លាមៗពីសំណាក់អាមេរិកប្រឆាំងនឹងរុស្ស៊ី បូករួមនឹងការផ្គត់ផ្គង់អាវុធដល់អ៊ុយក្រែន ការផ្គត់ផ្គង់ចារកម្ម ទីប្រឹក្សាយោធា និងទាហានស៊ីឈ្នួលដល់រដ្ឋាភិបាលទីក្រុងកៀវជាដើម” ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik