អាមេរិក​ បង្ហាញចំនួនទាហានរុស្ស៊ី ដែលស្លាប់និងរបួសនៅទីក្រុង Bakhmut

សេតវិមានជឿជាក់ថា យុទ្ធជនរុស្ស៊ីជាង ២ម៉ឺននាក់ បានស្លាប់នៅក្នុងការប្រយុទ្ធដណ្តើមយកទីក្រុង Bakhmut របស់អ៊ុយក្រែនក្នុងរយៈពេល៥ខែចុងក្រោយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ អ្នកនាំពាក្យក្រុមប្រឹក្សាសន្តិសុខជាតិ លោក John Kirby និយាយថា មនុស្សប្រហែល ៨ម៉ឺននាក់ទៀតបានរងរបួស។

លោក​​បន្ថែម​ថា លោក​មិន​​ផ្តល់​ការ​ប៉ាន់​ស្មាន​អំពី​ទាហានអ៊ុយក្រែន​ស្លាប់​និង​របួសទេ ​ព្រោះពួកគេគឺ​ជា​ជនរងគ្រោះ ដោយសាររុស្ស៊ី​ជា​អ្នកវាយលុក។

លើសពីនេះ សហរដ្ឋអាមេរិកនិយាយថា ពាក់កណ្តាលនៃអ្នកស្លាប់ខាងភាគីរុស្ស៊ី គឺជាទាហានស៊ីឈ្នួលមកពីក្រុមហ៊ុនឯកជន Wagner។

ប្រសិនបើតួលេខនេះ ត្រូវបានបញ្ជាក់ថាត្រឹមត្រូវមែននោះ ចំនួនទាហានរុស្ស៊ីដែលស្លាប់និងរបួស គឺលើសពីចំនួនប្រជាជនមុនសង្គ្រាមនៅទីក្រុងភាគខាងកើតមួយនេះទៅទៀត។

ទោះបីជាយ៉ាងណាក៏ដោយ ទីក្រុងមូស្គូ​ មិន​បាន​ធ្វើ​អត្ថាធិប្បាយ​អ្វីទេលើព័ត៌មាននេះ។

គួរបញ្ជាក់ថា ទីក្រុងមូស្គូបានព្យាយាមដណ្តើមយកទីក្រុង Bakhmut តាំងពីឆ្នាំមុនមកម្ល៉េះ នៅក្នុងសង្គ្រាមដ៏ស្វិតស្វាញ។

មន្ត្រីអ៊ុយក្រែនក៏បាននិយាយផងដែរថា ពួកគេកំពុងប្រើប្រាស់សមរភូមិនេះ ដើម្បីសម្លាប់ទាហានរុស្ស៊ីឲ្យបានច្រើនតាមដែលអាចធ្វើទៅបាន៕

ប្រែសម្រួល៖ Vann Vann

ប្រភព៖ BBC

ចុចអាន៖ រុស្ស៊ី បើកការវាយប្រហារអាកាសទ្រង់ទ្រាយធំលើអ៊ុយក្រែន សម្លាប់ជនស៊ីវិល ២៥នាក់