កងកម្លាំងប្រដាប់អាវុធ ស៊ូដង់ វាយកម្ទេចមន្ទីរពេទ្យ ទោះមានបទឈប់បាញ់​ក៏ដោយ

កងកម្លាំងគាំទ្ររហ័ស (RSF) របស់ស៊ូដង់បានអះអាងថា កងកម្លាំងប្រដាប់អាវុធស៊ូដង់ (SAF) បានវាយប្រហារកន្លែងព្យាបាលមួយកន្លែង បន្ទាប់ពីភាគីទាំងពីរបានយល់ព្រមបន្តបទឈប់បាញ់រយៈពេល ៧២ ម៉ោងបន្ថែមទៀត ។

អាជ្ញាធរសុខាភិបាលស៊ូដង់បាននិយាយថា យ៉ាងហោចណាស់មនុស្សចំនួន ៥២៨ នាក់ត្រូវបានសម្លាប់ ចាប់តាំងពីអំពើហិង្សាបានផ្ទុះឡើងកាលពីថ្ងៃទី ១៥ ខែមេសា ។

ប្រព័ន្ធផ្សព្វផ្សាយបាននិយាយថា សំឡេងនៃការប្រយុទ្ធគ្នាដោយកាំភ្លើង និងការបាញ់កាំភ្លើងធំត្រូវបានបន្លឺឡើងជាបន្តបន្ទាប់ទាំងនៅក្នុង និងនៅជុំវិញរដ្ឋធានីខាទុំកាលពីថ្ងៃចន្ទ បើទោះបីជាបទឈប់បាញ់ដែលបានចូលជាធរមានក៏ដោយ ។

ទន្ទឹមនោះ យោធាស៊ូដង់បានចោទប្រកាន់កងកម្លាំង RSF កាលពីថ្ងៃចន្ទថា បានចល័តយុទ្ធជន និងអាវុធជាច្រើននៅក្នុងទីក្រុង ខាទុំ បើទោះបីជាយោធាបានទប់ទល់សមត្ថភាពប្រយុទ្ធរបស់គូប្រជែងប្រមាណ ៥០ ភាគរយក៏ដោយ ។

ស្របពេលជាមួយគ្នានេះ RSF បានចោទប្រកាន់ទៅខាងយោធាវិញថា បានវាយប្រហារកន្លែងមួយដែលក្រុមនេះប្រើប្រាស់ជាមូលដ្ឋានពេទ្យ ហើយបានសម្លាប់មនុស្សជាច្រើននាក់ដែលកំពុងស្ថិតក្នុងទីតាំងនោះ ខណៈសមាគមគ្រូពេទ្យនៃប្រទេសស៊ូដង់បាននិយាយ បន្ទាប់ពីការវាយប្រហារនោះថា មន្ទីរពេទ្យច្រើនជាង ២ ភាគ ៣ នៅក្នុងតំបន់ដែលមានការប្រយុទ្ធគ្នាយ៉ាងសកម្ម គឺមិនអាចបើកដំណើរការបានទៀតនោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក ហ្សេលេនស្គី ថា ឆាប់ៗនេះ អ៊ុយក្រែន នឹងបើកការវាយលុកដើម្បី ដណ្ដើមទឹកដីពី រុស្ស៊ី មកវិញ