គ្រូបង្រៀនច្រើននាក់ ត្រូវបាញ់សម្លាប់នៅ ប៉ាគីស្ថាន

មនុស្សចំនួន៧នាក់ ដោយក្នុងនោះរួមមានទាំងគ្រូបង្រៀនមួយចំនួនផងដែរ ត្រូវបានបាញ់សម្លាប់នៅសាលាមួយក្នុងសង្កាត់ Kurram ភាគពាយព្យប្រទេសប៉ាគីស្ថាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ូលិសនិយាយថា ក្នុងឧប្បត្តិហេតុនេះ ខ្មាន់កាំភ្លើងជាច្រើននាក់បានសម្រុកចូលបន្ទប់បុគ្គលិកនៃវិទ្យាល័យរដ្ឋាភិបាល Tari Mangal។

យោងតាមមន្ត្រី​ប៉ូលិស ការ​បាញ់​ប្រហារ​នេះ​ត្រូវ​បាន​គេ​គិត​ថា ​មាន​ជាប់​ពាក់ព័ន្ធ​នឹង​រឿង​មួយ​ទៀត​នៅ​ព្រឹក​ថ្ងៃដដែល ​ដែល​បុរស​ម្នាក់​ត្រូវ​បាន​គេ​បាញ់​​ក្នុង​រថយន្ត​នៅ​សង្កាត់នេះ។

ទោះបីជាយ៉ាងណាក៏ដោយ ព័ត៌មានលម្អិតអំពីអ្វីដែលបានកើតឡើងនៅសាលាក្នុងសង្កាត់ Kurram នៅតែមិនទាន់ត្រូវបានគេដឹងច្បាស់ ហើយប៉ូលិសមិនទាន់កំណត់អត្តសញ្ញាណជនសង្ស័យណាម្នាក់បានឡើយ។

ស្របពេលជាមួយគ្នានោះ ប្រធានាធិបតីប៉ាគីស្ថាន លោក Arif Alvi បានថ្កោលទោសយ៉ាងខ្លាំងក្លាចំពោះការសម្លាប់នេះ។

គួរបញ្ជាក់ថា តំបន់​ដែល​ការ​វាយ​ប្រហារ​បាន​កើត​ឡើង ​ត្រូវ​បាន​គេ​ដឹង​ថាជាកន្លែង​មាន​ជម្លោះ​រវាង​និកាយ​ស៊ុននី​និង​និកាយ​ស៊ីអ៊ីត​នៃ​សាសនាឥស្លាម។

យ៉ាងណា មិនទាន់មានក្រុមណា ចេញមុខអះអាងទទួលខុសត្រូវចំពោះការវាយប្រហារនេះនៅឡើយទេ៕

ប្រែសម្រួល៖ Vann Vann

ប្រភព៖ BBC, CNN

ចុចអាន៖ ក្មេងៗសិស្សសាលា ៤៩នាក់ស្លាប់ ក្នុងសោកនាដកម្មលិចទូក នៅ ប៉ាគីស្ថាន