មួយថ្ងៃ ជប៉ុន រញ្ជួយដីជាង ៥០លើក

ត្រឹមមួយថ្ងៃ ការរញ្ជួយដីជាច្រើនលើកបានកើតឡើងនៅប្រទេសជប៉ុន ក្រោយការរញ្ជួយដ៏ធំកម្រិត៦.៥រ៉ិចទ័របានបណ្តាលឲ្យមនុស្សម្នាក់ស្លាប់ និង២៣នាក់រងរបួស ហើយខូចខាតអគារជាច្រើន ខណៈខ្សែរថភ្លើងល្បឿនលឿនក៏ត្រូវបិទផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មានក្យូដូបានរាយការណ៍ថា បុរសអាយុ៦៥ឆ្នាំម្នាក់ បានស្លាប់នៅពេលគាត់ធ្លាក់ពីលើជណ្ដើរ អំឡុងពេលរញ្ជួយដីដែលវាយប្រហារតំបន់ Ishikawa កាលពីរសៀលថ្ងៃសុក្រទី៥ខែឧសភា។

ក្រោយមក ទីភ្នាក់ងារគ្រប់គ្រងគ្រោះមហន្តរាយជប៉ុននិយាយថា ការរញ្ជួយដីប្រហែល៥៥លើកផ្សេងទៀតបានវាយប្រហារនៅថ្ងៃសៅរ៍ ហើយព្រមានថា ភ្លៀងធ្លាក់ខ្លាំងអាចបង្កឲ្យមានការរអិលបាក់ដីនៅក្នុងតំបន់ដែលរងផលប៉ះពាល់។

ក្រុមហ៊ុន East Japan Railway Co និយាយថា ខ្សែរថភ្លើងល្បឿនលឿន ដែលតភ្ជាប់ទីក្រុងតូក្យូ និង Kanazawa ក្នុងខេត្ត Ishikawa ត្រូវផ្អាកជាបណ្តោះអាសន្នសម្រាប់ការត្រួតពិនិត្យសុវត្ថិភាព ប៉ុន្តែក្រោយក៏បន្តប្រតិបត្តិការធម្មតាឡើងវិញ។

ទោះបីជាយ៉ាងណាក៏ដោយ ​បើ​តាម​អាជ្ញាធរ​បទប្បញ្ញត្តិ​នុយក្លេអ៊ែរ​បាន​ឲ្យ​ដឹង​ថា មិន​មាន​ភាព​ខុស​ប្រក្រតី​ណាមួយទេនៅ​រោងចក្រ​ថាមពល​នុយក្លេអ៊ែរ​ក្នុង​តំបន់​។

គួរបញ្ជាក់ថា ថ្វីបើការរញ្ជួយដីគឺជារឿងធម្មតានៅជប៉ុនក៏ដោយ ប៉ុន្តែប្រទេសនេះនៅតែដិតដាមដោយការចងចាំនៃគ្រោះរញ្ជួយដីដ៏ធំកម្រិត៩.០រ៉ិចទ័រនៅភាគឦសានក្នុងខែមីនាឆ្នាំ២០១១។

គ្រោះរញ្ជួយដីនោះ បានបង្កជារលកយក្សស៊ូណាមិ ដែលបណ្តាលឲ្យមនុស្សប្រហែល ១៨៥០០នាក់ស្លាប់ ឬបាត់ខ្លួន៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ រញ្ជួយដីខ្លាំងក្លានៅអេក្វាទ័រ បណ្តាលឲ្យមនុស្ស ១២នាក់ ស្លាប់