ត្រឹមរយៈពេល ២៤ ម៉ោង បារាំង កត់ត្រារន្ទះបាញ់ជាង ២៥,០០០ ដង

យោងតាមក្រុមអ្នកសង្កេតព្យុះ និងផ្គររន្ទះបារាំងបានឲ្យដឹងកាលពីថ្ងៃអាទិត្យថា ត្រឹមតែរយៈពេល ២៤ ម៉ោងប៉ុណ្ណោះ បារាំងជួបហេតុការណ៍រន្ទះបាញ់មិនធ្លាប់មាននៅក្នុងប្រទេសជាង ២៥,០០០ ដង ។

ជាមួយនឹងការវាយប្រហារច្រើនជាង ២៥,០០០ ដងក្នុងរយៈពេល ២៤ ម៉ោងនេះ បើគិតជាមធ្យមបារាំងជួបហេតុការណ៍រន្ទះបាញ់ចំនួន ១,០៤១ ដងកើតឡើងក្នុងពេល ១ ម៉ោង ។

ទន្ទឹមនោះ បើយោងតាមរបាយការណ៍ប្រព័ន្ធផ្សព្វផ្សាយបារាំងបានឲ្យដឹងទៀតថា នាយកដ្ឋានសរុបចំនួន ៦៩ ត្រូវបានប្រកាសអាសន្នសម្រាប់ហានិភ័យនៃព្យុះផ្គររន្ទះនៅក្នុងប្រទេស ។

ដូចគ្នានេះ ព្យុះព្រិលដ៏ខ្លាំងក្លាក៏ត្រូវបានកត់ត្រាផងដែរនៅភាគខាងកើតប្រទេសបារាំង ចំពេលអាកាសធាតុមានព្យុះ ខណៈថ្មីៗ​នេះ អាជ្ញាធរ​ឧតុនិយម​បារាំងបាន​ព្រមាន​ពី​ព្យុះ ​និង​ភ្លៀង​ធ្លាក់​ខ្លាំង​ក្នុង​តំបន់​ជា​ច្រើន ។

ដោយឡែក ទោះបីជាមានមានភ្លៀងធ្លាក់ក៏ដោយ ក៏ប្រទេសបារាំងស្ថិតក្នុងចំណោមបណ្តាប្រទេសនៅអឺរ៉ុបដែលមានរយៈពេលស្ងួតជាងគេ ខណៈកាលពីថ្ងៃ​ទី២១ ខែកុម្ភៈ បារាំងបានកត់ត្រាស្ថានភាពស្ងួតបំផុតរបស់ខ្លួនក្នុងរយៈពេល ៣១ ថ្ងៃដោយគ្មានសញ្ញា​នៃភ្លៀងធ្លាក់សោះ ៕

ប្រែសម្រួល ៖ នាង រតនៈ

ប្រភព៖ Anadolu

ចុចអាន៖ ព្យុះ ២ នឹងវាយប្រហារប្រទេសថៃ ចំថ្ងៃបោះឆ្នោត