ព័ត៌មានអន្ដរជាតិ

រុស្ស៊ី៖ គ្មានប្រទេសណា ហ៊ានចាប់ខ្លួនលោក ពូទីន តាមដីការបស់ ICC ទេ

បានផុស

២ years មុន

នៅ

ថ្ងៃព្រហស្បតិ៍ ១១ ឧសភា ២០២៣

ដោយ

អ្នកនាំពាក្យវិមានក្រឹមឡាំង លោក Dmitry Peskov បាននិយាយនៅក្នុងបទសម្ភាសមួយកាលពីថ្ងៃពុធ ទី១០ ខែឧសភាថា តុលាការឧក្រិដ្ឋកម្មអន្តរជាតិ (ICC) គឺជាអាយ៉ងរបស់លោកខាងលិច ហើយរុស្ស៊ីពិបាកនឹងស្រមៃណាស់ថា មានប្រទេសហ៊ានអនុវត្តដីកាចាប់ខ្លួនលោក ពូទីន ដែលជាប្រធានាធិបតីនៃប្រទេសមហាអំណាចនុយក្លេអ៊ែរអធិបតេយ្យមួយនេះ ។

ប្រធានាធិបតីរុស្ស៊ីលោក វ្ល៉ាឌីមៀរ ពូទីន (រូបថត៖ CNN)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Peskov បានលើកឡើងបែបនេះ ជាការឆ្លើយតបទៅសំណួររបស់ទូរទស្សន៍ ATV អំពីការចោទប្រកាន់របស់ ICC ប្រឆាំងនឹងលោកប្រធានាធិបតី វ្ល៉ាឌីមៀរ ពូទីន និងស្នងការសិទ្ធិកុមារលោកស្រី Maria Lvova-Belova។

លោក Peskov បានប្រាប់ ATV ថា ដីកា ICC មានន័យថា អាចមានរដ្ឋនៅទីនោះខ្វះអធិបតេយ្យ ហើយប្រហែលជាគិតថា ពួកគេមានចំណាប់អារម្មណ៍ក្នុងការធ្វើសកម្មភាពលើដីកានោះ ប្រសិនបើពួកគេទទួលបានឱកាស។ ប៉ុន្តែខ្ញុំមិនហ៊ានស្រមៃទេថា នឹងមាននរណាម្នាក់ ហ៊ានធ្វើតាមដីកានោះប្រឆាំងនឹងប្រធានាធិបតីរុស្ស៊ី។

លោកបន្ថែមថា វាជារឿងដែលមិនអាចនឹកដល់ រុស្ស៊ីគឺជាប្រទេសធំបំផុតមួយក្នុងពិភពលោក និងជាមហាអំណាចនុយក្លេអ៊ែរធំបំផុតមួយ។

អ្នកនាំពាក្យវិមានក្រឹមឡាំង លោក Dmitry Peskov (រូបថត៖ Reuters)

លោកថែមទាំងអះអាងទៀតថា រុស្ស៊ីមិនមែនជាប្រទេសហត្ថលេខីនៃលក្ខន្តិកៈទីក្រុងរ៉ូមទេ ហើយក៏មិនទទួលស្គាល់តុលាការដែលមានមូលដ្ឋាននៅទីក្រុងឡាអេ មួយនេះដែរ។

លោក Peskov គូសបញ្ជាក់ថា “ក្នុងកាលៈទេសៈបច្ចុប្បន្ន យើងចាត់ទុកស្ថាប័ននេះ ជាអាយ៉ងលោកខាងលិច ដែលគេកំពុងប្រើប្រាស់ដើម្បីដាក់សម្ពាធប្រទេសរបស់យើង។ ពួកគេនឹងមិនជោគជ័យឡើយ”។

គួរបញ្ជាក់ថា កាលពីខែមីនា ICC បានចេញដីកាចាប់ខ្លួន ដោយអះអាងថា លោក ពូទីន និងលោកស្រី Lvova-Belova ជាអ្នកទទួលខុសត្រូវការនិរទេសកុមារដោយខុសច្បាប់ ចេញពីតំបន់កាន់កាប់នៅក្នុងប្រទេសអ៊ុយក្រែន៕

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី ចោទថា ICC ធ្វើតាមបញ្ជាលោកខាងលិច