សហភាពអឺរ៉ុបគាំទ្រគោលនយោបាយ កាត់បន្ថយការពឹងផ្អែកលើប្រទេសចិន

រដ្ឋមន្ត្រីការបរទេសនៃបណ្ដាប្រទេសក្នុងសហភាពអឺរ៉ុប (EU) បានពិភាក្សាគ្នាកាលពីពេលថ្មីៗនេះនៅក្នុងប្រទេសស៊ុយអែត ដោយយល់ព្រមគាំទ្រគោលនយោបាយកាត់បន្ថយការពឹងផ្អែកលើប្រទេសចិន ។

បន្ទាប់ពីកិច្ចប្រជុំនេះ ប្រធានគោលនយោបាយការបរទេសរបស់សហភាពអឺរ៉ុប លោក Josep Borrell បាននិយាយថា រដ្ឋមន្ត្រីបានយល់ព្រមលើចំណុចមូលដ្ឋានមួយ សម្រាប់ការកែសម្រួលយុទ្ធសាស្ត្រជាមួយប្រទេសចិន ។

លោកថា EU បានពឹងផ្អែកលើប្រទេសចិនច្រើនពេកសម្រាប់ការផ្គត់ផ្គង់សម្ភារៈ និងបច្ចេកវិទ្យាសំខាន់ៗ ។ ទោះបីជា EU កាត់បន្ថយការពឹងផ្អែកនេះក៏ដោយ តែលោកក៏សង្ឃឹមថា ចិននឹងបន្តជាដៃគូរសហការលើពិភពលោកដដែរ ។

ទន្ទឹមនោះ កិច្ចពិភាក្សានេះបានធ្វើឡើង ចំពេលមានការអំពាវនាវកាន់តែខ្លាំងឡើងសម្រាប់ជំហរបង្រួបបង្រួមរបស់សហភាពអឺរ៉ុបប្រឆាំងនឹងប្រទេសចិន ខណៈអាមេរិក​ និង​ចិន​នៅ​មាន​បញ្ហារកាំរកូសជាមួយគ្នានៅឡើយ ។

គួរបញ្ជាក់ថា បច្ចុប្បន្នប្រទេសសមាជិកសហភាពអឺរ៉ុបនីមួយៗមានទស្សនៈខុសគ្នាពាក់ព័ន្ធនឹងការពឹងផ្អែកលើប្រទេសចិន ពោលអាស្រ័យលើកម្រិតនៃទំនាក់ទំនងសេដ្ឋកិច្ចដែលខ្លួនដែលបានរក្សាជាមួយទីក្រុងប៉េកាំង ៕​

ប្រែសម្រួល៖ នាង រតនៈ

ប្រភព៖ NHK

ចុចអាន៖ ការកាប់បំផ្លាញព្រៃអាម៉ាហ្សូននៅ ប្រេស៊ីល ថយចុះជិត ៧០ ភាគរយ ក្រោយ ប្រធានាធិបតីថ្មីចូលកាន់តំណែង