មេទ័ពថៃ ៥រូបនិងអគ្គស្នងការនគរបាលជាតិ នឹងមិនបោះឆ្នោត ជ្រើសរើសនាយករដ្ឋមន្ត្រីថ្មីទេ

មន្ត្រីយោធាកំពូលរបស់ប្រទេសថៃទាំង៥រូប និងអគ្គស្នងការនគរបាលជាតិ ដែលស្ថិតនៅក្នុងព្រឹទ្ធសភា បាននិយាយថា ពួកគេនឹងមិនបោះឆ្នោតជ្រើសរើសនាយករដ្ឋមន្ត្រីថ្មីឡើយ។ នេះបើតាមការឲ្យដឹងពីប្រភពយោធា នៅថ្ងៃពុធទី១៧ខែឧសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីយោធាកំពូលទាំង៥រូបនៅក្នុងព្រឹទ្ធសភានេះគឺមានដូចជា លេខាធិការអចិន្ត្រៃយ៍នៃក្រសួងការពារជាតិ Sanitchanok Sangkhachan, អគ្គ​មេ​បញ្ជាការ​កំពូល Chalermpol Srisawat, មេបញ្ជាការកងទ័ព Narongpan Jitkaewthae, មេទ័ពជើងទឹក Choengchai Chomchoengpaet និងមេទ័ពអាកាស Alongkorn Vannarot។

ប្រភព​ខាងលើបាន​ឲ្យ​ដឹង​ថា មន្ត្រី​យោធា​កំពូល​ទាំង៥​រូបនេះ និង​អគ្គស្នងការ​នគរបាល​ជាតិ Damrongsak Kittiprapas បាន​សម្រេច​ចិត្ត ​មិន​ចូល​រួមជាមួយ​សមាជិក​ព្រឹទ្ធសភា​ចំនួន២៤៤រូប​ទៀត ដើម្បី​បោះឆ្នោត​ជ្រើសរើស​នាយក​រដ្ឋមន្ត្រី​បន្ទាប់នោះទេ។

ទោះបីជាយ៉ាងណាក៏ដោយ ប្រភពដដែល​បានអះអាង​ថា មេ​ប៉ូលិស និង​មេទ័ព ​បានលះបង់​សិទ្ធិ​បោះឆ្នោត​លើ​បញ្ហា​នយោបាយ​ ព្រោះ​ពួកគេចង់​រក្សា​អព្យាក្រឹតភាព។

លើសពីនេះ អ្នកទាំង៦បានប្រកាសថា ពួកគេនឹងមិនយកប្រាក់ខែសមាជិកព្រឹទ្ធសភាឡើយ ហើយបដិសេធបោះឆ្នោតលើបញ្ហាផ្សេងទៀតនៅក្នុងសភា។

ប្រភពខាងលើបានបន្ថែមថា វានឹងចំណាយពេលបន្តិច មុនពេលដែលសភាទាំងពីរ ធ្វើការរួមគ្នាដើម្បីជ្រើសរើសនាយករដ្ឋមន្ត្រីបន្ទាប់ ដោយសារតែគណៈកម្មការរៀបចំការបោះឆ្នោត មិនទាន់អនុម័តលទ្ធផលឆ្នោតសម្រាប់សភាតំណាងរាស្រ្ត ដើម្បីកោះប្រជុំលើកដំបូង និងជ្រើសរើសប្រធានសភា។

គួរបញ្ជាក់ថា ការជ្រើសរើសតំណែងនាយករដ្ឋមន្ត្រីថៃ ត្រូវតែទទួលបានសំឡេងគាំទ្រ ពីសភាទាំង២យ៉ាងតិច ៣៧៦សំឡេង នៅក្នុងចំណោមរដ្ឋសភា ដែលមាន៥០០អាសនៈ និង ព្រឹទ្ធសភា ដែលមាន២៥០អាសនៈ៕

ប្រែសម្រួល៖ Vann Vann

ប្រភព៖ Nation

ចុចអាន៖ ប្រជាជនថៃ រាប់ម៉ឺននាក់ ចេញអបអរជ័យជម្នះរបស់គណបក្ស ចលនាឆ្ពោះទៅមុខ