លោក ពូទីន និង ហ្សេលេនស្គី យល់ព្រមជួបមេដឹកនាំអាហ្វ្រិក ដើម្បីពិភាក្សាផែនការសន្តិភាព 

លោកវ្ល៉ាឌីមៀ ពូទីន និងលោក វ្ល៉ាឌីមៀរ ហ្សេលេនស្គី បានយល់ព្រមជួបប្រជុំដាច់ដោយឡែកពីគ្នា ជាមួយគណៈប្រតិភូនៃប្រមុខរដ្ឋអាហ្រ្វិក ដើម្បីពិភាក្សាអំពីផែនការ បញ្ចប់សង្រ្គាមនៅអ៊ុយក្រែន។ នេះបើតាមការបញ្ជាក់ពីប្រធានាធិបតីអាហ្វ្រិកខាងត្បូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យការិយាល័យប្រធានាធិបតីអាហ្វ្រិកខាងត្បូង លើកឡើងថា លោក Cyril Ramaphosa បាននិយាយជាមួយសមភាគីរុស្ស៊ី និងអ៊ុយក្រែន តាមទូរស័ព្ទកាលពីចុងសប្តាហ៍។ មេដឹកនាំទាំងពីរ បានយល់ព្រមរៀបចំបេសកកម្មសន្តិភាពសម្រាប់មេដឹកនាំអាហ្វ្រិក នៅក្នុងប្រទេសរៀងៗខ្លួន។

លោកប្រធានាធិបតីបញ្ជាក់ថា មេដឹកនាំនៃប្រទេសសំប៊ី, សេណេហ្គាល់, កុងហ្គោ, អ៊ូហ្គង់ដា និង អេហ្ស៊ីប គ្រោងនឹងចូលរួមជាមួយលោក Ramaphosa ក្នុងបេសកកម្មនេះ។

ទោះបីជាយ៉ាងណាក៏ដោយ មិន​មាន​ព័ត៌មាន​លម្អិតអំពីលក្ខខណ្ឌនៃ​កិច្ច​ពិភាក្សា​នោះ​ទេ ប៉ុន្តែលោក ហ្សេលេនស្គី ធ្លាប់និយាយថា លោកនឹងមិនពិចារណាលើកិច្ចព្រមព្រៀងសន្តិភាពដើម្បីបញ្ចប់សង្រ្គាមឡើយ រហូតដល់កងកម្លាំងរុស្ស៊ី ដកចេញទាំងស្រុងពីទឹកដីអ៊ុយក្រែន។

គួរបញ្ជាក់ថា រុស្ស៊ីបានបើកការលុកលុយអ៊ុយក្រែន កាលពីខែកុម្ភៈឆ្នាំមុន ប៉ុន្តែពេលនេះ សង្រ្គាមហាក់ត្រូវជាប់គាំង ថ្វីបើអ៊ុយក្រែនត្រូវបានគេរំពឹងថា នឹងចាប់ផ្តើមការវាយបកក្នុងពេលឆាប់ៗនេះ ដើម្បីព្យាយាមដណ្តើមយកទឹកដីដែលកាន់កាប់ដោយរុស្ស៊ីមកវិញក៏ដោយ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ រុស្ស៊ី ថា លោក Zelensky នឹងមានជោគវាសនាចុងក្រោយដូច Hitler