ព័ត៌មានអន្ដរជាតិ

លោក ប្រាយុទ្ធ ៖ ខ្ញុំនៅតែជានាយករដ្ឋមន្ត្រី ថៃ

បានផុស

២ years មុន

នៅ

ថ្ងៃពុធ ១៧ ឧសភា ២០២៣

ដោយ

នាយករដ្ឋមន្ត្រីផុតអាណត្តិរបស់ថៃលោក ប្រាយុទ្ធ ចាន់អូចា បានលើកឡើងកាលពីថ្ងៃអង្គារថា លោកនៅតែកាន់កាប់ការងារជានាយករដ្ឋមន្ត្រី រហូតដល់រដ្ឋាភិបាលថ្មីត្រូវបានបង្កើតឡើង ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការអត្ថាធិប្បាយនៅឯវិមានរដ្ឋាភិបាល បន្ទាប់ពីលោកអញ្ជើញធ្វើជាអធិបតីក្នុងកិច្ចប្រជុំគណៈរដ្ឋមន្ត្រីប្រចាំសប្តាហ៍, លោក ប្រាយុទ្ធ បាននិយាយថា “ខ្ញុំនឹងធ្វើការជានាយករដ្ឋមន្ត្រីចាំផ្ទះ និងជាមេដឹកនាំរដ្ឋាភិបាលរហូតដល់មានរដ្ឋាភិបាលថ្មីមួយត្រូវបានបង្កើតឡើង ហើយលោកសូមអរគុណដល់ប្រជាពលរដ្ឋដែលគាំទ្រគាត់ និងរដ្ឋាភិបាលរបស់គាត់ក្នុងរយៈពេល ៨ ឆ្នាំកន្លងមកនេះ” ។

លោកឧត្តមសេនីយ៍រូបនេះបានបន្ថែមថា លោកអរគុណប្រជាពលរដ្ឋដែលបានចេញទៅបោះឆ្នោតកាលពីថ្ងៃអាទិត្យ ទោះបីជាលោកចាញ់ឆ្នោតក៏ដោយ សូមប្រជាជននៅក្នុងប្រទេសថៃគួរតែរក្សាការរួបរួមគ្នា ព្រោះថាប្រទេសជាតិអាចអភិវឌ្ឍទៅបាន លុះត្រាតែមានការស្រឡាញ់គ្នា និងឯកភាពគ្នា” ។

លោក ប្រាយុទ្ធ បានបញ្ជាក់ទៀតថា គណបក្សថៃរួបរួមជាតិ(UTNP) របស់លោកទទួលបានការគាំទ្រយ៉ាងល្អពីប្រជាជន បើទោះបីជាចាញ់ឆ្នោតលើគណបក្សចលនាឆ្ពោះទៅមុខ (MFP) ក៏ដោយ ហើយបក្សរបស់លោកនឹងប្រកាន់ខ្ជាប់នូវគោលការណ៍របស់ខ្លួនសម្រាប់ជាតិ សាសនា និងរាជាធិបតេយ្យ ពោលមិនទទួលយកតួនាទីអ្វីនៅក្នុងជួររដ្ឋាភិបាលថ្មីនោះទេ ។

គួរបញ្ជាក់ថា គណបក្សថៃរួបរួមជាតិ(UTNP) របស់លោក ប្រាយុទ្ធ ឈរនៅលេខរៀងទី៥ ដោយទទួលបានត្រឹមតែ ៣៦ អាសនៈប៉ុណ្ណោះក្នុងសភាតំណាងរាស្រ្តចំនួន ៥០០ អាសនៈ ខណៈគណបក្សចលនាឆ្ពោះទៅមុខ (MFP) ទទួលបានរហូតដល់ ១៥១ អាសនៈ ៕