អាមេរិក ព្រមាន កូរ៉េខាងជើង ជុំវិញការបាញ់បង្ហោះផ្កាយរណប

ក្រសួងការបរទេសអាមេរិកបាននិយាយថា ការបាញ់បង្ហោះផ្កាយរណបរបស់ទីក្រុងព្យុងយ៉ាង នឹងរំលោភលើទណ្ឌកម្មអន្តរជាតិដែលដាក់លើប្រទេសកូរ៉េខាងជើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍នេះធ្វើឡើង បន្ទាប់ពីប្រព័ន្ធផ្សព្វផ្សាយកូរ៉េខាងជើងលាតត្រដាងថា លោក គីម ជុងអ៊ុន បានចុះទៅពិនិត្យទីតាំងមួយកន្លែង ដែលកំពុងផលិតយានអវកាស។

ក្នុងអំឡុងសន្និសីទសារព័ត៌មានកាលពីថ្ងៃព្រហស្បតិ៍ទី១៨ខែឧសភា អ្នកនាំពាក្យរងនៃក្រសួងការបរទេសសហរដ្ឋអាមេរិក លោក Vedant Patel បាននិយាយថា ការបាញ់បង្ហោះនេះនឹងបំពានលើសេចក្តីសម្រេចជាច្រើនរបស់ក្រុមប្រឹក្សាសន្តិសុខអង្គការសហប្រជាជាតិ ស្តីពីកម្មវិធីមីស៊ីលផ្លោងរបស់ប្រទេសកូរ៉េខាងជើង ដែលសេចក្តីសម្រេចនោះ ក៏គ្របដណ្តប់លើគ្រាប់រ៉ុកកែតដែលប្រើប្រាស់សម្រាប់យានអវកាសផងដែរ។

លោក Patel និយាយថា “យើងសូមជំរុញឲ្យកូរ៉េខាងជើង កុំធ្វើសកម្មភាពដែលគំរាមកំហែងបន្ថែមទៀត ហើយសូមអំពាវនាវឲ្យទីក្រុងព្យុងយ៉ាង ចូលរួមក្នុងផ្នែកទូត។ បើ​និយាយ​ពី​សកម្មភាពវិញ ពិតណាស់ យើងមាន​វិធី​ជាច្រើនដែលអាចនាំ​កូរ៉េខាងជើង ឲ្យមក​ទទួល​ខុសត្រូវ”។

គួរបញ្ជាក់ថា បច្ចុប្បន្ន សហរដ្ឋ​អាមេរិក​នៅ​តែ​រក្សា​ការ​ដាក់​ទណ្ឌកម្ម​លើ​កូរ៉េ​ខាង​ជើង និង​បាន​គំរាម​ដាក់​ទណ្ឌកម្ម​ថ្មី​ក្នុង​ពេល​កន្លង​មក ​ជុំវិញ​ការ​ធ្វើ​តេស្ត​អាវុធ។

ទោះបីជាយ៉ាងណាក៏ដោយ ទីក្រុងព្យុងយ៉ាងបានទទូចលើសិទ្ធិរបស់ខ្លួនក្នុងការអភិវឌ្ឍសមត្ថភាពយោធា ដោយលើកហេតុផលថា សព្វាវុធរបស់ខ្លួន រួមទាំងឃ្លាំងអាវុធនុយក្លេអ៊ែរផងដែរនោះ គឺសម្រាប់គោលបំណងការពារ ហើយបានលើកឡើងពីអ្វីដែលខ្លួនមើលឃើញថា ជាជំហរយោធាដ៏គឃ្លើនរបស់អាមេរិកនៅតាមព្រំដែនរបស់ខ្លួន៕

ប្រែសម្រួល៖ Vann Vann

ប្រភព៖ RT

ចុចអាន៖ មិននឹកស្មានថា កូរ៉េខាងជើង កាន់តែអស្ចារ្យ នៅកន្លែងណាក៏អាចបាញ់មីស៊ីលបាន