ប្រេសិតតៃវ៉ាន់ចូលរួមពិធីឡើងកាន់តំណែងប្រធានាធិបតីអាមេរិកជាលើកដំបូងចាប់តាំងពីឆ្នាំ ១៩៧៩

ប្រេសិតតៃវ៉ាន់ប្រចាំនៅសហរដ្ឋអាមេរិកលោកស្រី Hsiao Bi-khim មានវត្តមាននៅក្នុងពិធីសម្ពោធឡើងកាន់តំណែងកាលពីថ្ងៃពុធរបស់លោកប្រធានាធិបតី Joe Biden ដែលជាការតំណាងជាផ្លូវការលើកដំបូងរបស់តៃវ៉ាន់នៅទីក្រុងវ៉ាស៊ីនតោន ចាប់តាំងពីសហរដ្ឋអាមេរិកបានកាត់ផ្តាច់ចំណងការទូតជាមួយក្រុងតៃប៉ិអស់រយៈពេលជាង ៤០ ឆ្នាំកន្លងមកនេះ ។

នៅមុខវិមានកាពីតូលក្នុងវីដេអូមួយដែលបានបង្ហោះនៅលើបណ្តាញសង្គម Twitter លោកស្រី Hsiao ថា “វាពិតជាកិត្តិយសដែលត្រូវបានតំណាងឲ្យប្រជាជន និងរដ្ឋាភិបាលតៃវ៉ាន់នៅទីនេះក្នុងពិធីសម្ពោធឡើងកាន់តំណែងលោកប្រធានាធិបតី Biden និងអនុប្រធានាធិបតី Harris ។

អ្នកការទូតរូបនេះបន្ថែមថា លោកស្រីកំពុងទន្ទឹងរងចាំធ្វើការជាមួយរដ្ឋបាលថ្មីរបស់សហរដ្ឋអាមេរិក ។

សហរដ្ឋអាមេរិករួមជាមួយប្រទេសជាច្រើនទៀតមិនទទួលស្គាល់តៃវ៉ាន់ជាប្រទេសអធិបតេយ្យនោះទេ និងប្រកាន់ខ្ជាប់ជាផ្លូវការនូវគោលនយោបាយ “ចិនតែមួយ” ។ ទោះយ៉ាងណាក្រុងវ៉ាស៊ីនតោនបានរក្សាទំនាក់ទំនងក្រៅផ្លូវការជាមួយកោះនេះ បន្ទាប់ពីបានផ្តាច់ចំណងការទូតជាមួយប្រទេសនេះក្នុងឆ្នាំ ១៩៧៩ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អ្នកបើកយន្តហោះត្រូវដេញចោលនិងពិន័យជាង១ម៉ឺនដុល្លារដោយសារធ្វើឲ្យផ្ទុះការឆ្លងកូវីដក្នុងសហគមន៍

ចុចអាន ៖ កងទ័ពចិនដាក់ពង្រាយរថក្រោះប្រយុទ្ធតាមដងផ្លូវ ត្រៀមធ្វើសង្គ្រាមជាមួយតៃវ៉ាន់