ព័ត៌មានអន្ដរជាតិ

TikTok ប្ដឹងបកទៅរដ្ឋ Montana របស់អាមេរិក ជុំវិញការហាមឃាត់កម្មវិធីរបស់ខ្លួន

បានផុស

២ years មុន

នៅ

ថ្ងៃអង្គារ ២៣ ឧសភា ២០២៣

ដោយ

TikTok បានដាក់ពាក្យបណ្តឹងប្រឆាំងនឹងរដ្ឋ Montana របស់សហរដ្ឋអាមេរិកវិញកាលពីថ្ងៃចន្ទ បន្ទាប់ពីរដ្ឋមួយនេះ បានចេញច្បាប់ហាមឃាត់កម្មវិធីកម្សាន្តដ៏ពេញនិយមនៅដើមឆ្នាំក្រោយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

TikTok អះអាងថា ការហាមប្រាមកម្មវិធីនេះ គឺមិនស្របនឹងរដ្ឋធម្មនុញ្ញ និងរំលោភបំពានលើសិទ្ធិវិសោធនកម្មទី១ ក៏ដូចជាច្បាប់សហព័ន្ធផ្សេងទៀតជាដើម ។ រដ្ឋ Montana មិនមានសិទ្ធិអំណាចក្នុងការអនុម័តច្បាប់ដែលជាគោលនយោបាយការបរទេសរបស់សហរដ្ឋអាមេរិក ឬផលប្រយោជន៍សន្តិសុខជាតិរបស់ខ្លួននោះទេ ហើយរដ្ឋមួយនេះក៏មិនអាចហាមឃាត់វេទិកាទាំងមូលសម្រាប់ការទំនាក់ទំនងដោយផ្អែកលើការយល់ឃើញរបស់ខ្លួនផងដែរ ។

ទន្ទឹមនោះ អ្នកនាំពាក្យ TikTok លោក Brooke Oberwetter បាននិយាយថា ក្រុមហ៊ុនកំពុងធ្វើការប្រឈមនឹងការហាមឃាត់មិនស្របតាមរដ្ឋធម្មនុញ្ញរបស់រដ្ឋ Montana ដើម្បីការពារអាជីវកម្មរបស់ពួកគេ និងសិទ្ធិរបស់អ្នកប្រើប្រាស់រាប់ពាន់នាក់នៅរដ្ឋមួយនេះ ។

គួរឲ្យដឹងថា ចំពោះច្បាប់ពិន័យ និងហាមប្រាមនេះ ត្រូវបានចុះហត្ថលេខាដោយអភិបាលរដ្ឋ Montana លោក Greg Gianforte កាលពីសប្តាហ៍មុន ហើយអ្នកដែលល្មើសច្បាប់នឹងត្រូវពិន័យ ១ ម៉ឺនដុល្លារក្នុងមួយថ្ងៃ ខណៈដែលច្បាប់មួយនេះត្រូវបានសមាជិកសភានៅរដ្ឋ Montana បានបោះឆ្នោតគាំទ្រកាលពីខែមេសាកន្លងទៅ ។

ស្របពេលជាមួយគ្នានេះ ក្រៅពីរដ្ឋ Montana, សហរដ្ឋអាមេរិកទាំងមូល និងប្រទេសមួយចំនួនទៀតក៏បានដាក់កម្រិតលើ TikTok រួចទៅហើយផងដែរ ដោយបារម្មណ៍ពីសុវត្ថិភាពទិន្នន័យអ្នកប្រើប្រាស់ ៕

ប្រែសម្រួល ៖ នាង រតនៈ

ប្រភព ៖ Anadolu