អតីតរដ្ឋមន្ត្រីការបរទេស អាមេរិក ថា អ៊ុយក្រែន ត្រូវតែបោះបង់គំនិតចង់បាន​តំបន់គ្រីមៀ

អតីតរដ្ឋមន្ត្រីការបរទេសអាមេរិក លោក Henry Kissinger បាននិយាយនៅក្នុងបទសម្ភាសន៍មួយជាមួយកាសែត Wall Street Journal ដែលចុះផ្សាយកាលពីថ្ងៃសុក្រថា អ៊ុយក្រែនមិនគួរប៉ុនប៉ងចង់បានមកវិញនូវតំបន់គ្រីមៀ និងទីក្រុង Sevastopol នោះទេ ព្រោះវាអាចនាំឲ្យមានផលវិបាកអវិជ្ជមានសម្រាប់ពិភពលោកទាំងមូល ។

លោក Kissinger បាននិយាយថា “សម្រាប់ប្រទេសរុស្ស៊ី ប្រសិនបើបាត់បង់តំបន់គ្រីមៀ និងទីក្រុង Sevastopol នោះវានឹងស្ថិតក្នុងគ្រោះថ្នាក់ ហើយខ្ញុំគិតថា ពិភពលោកគឺមិនចង់ឃើញបែបនេះនោះទេ ដូច្នេះអ៊ុយក្រែនគួរតែបោះបង់គំនិតចង់បានតំបន់ទាំងពីរនេះទៅ” ។

បន្ទាប់ពីរដ្ឋប្រហារដែលគាំទ្រដោយលោកខាងលិចនៅអ៊ុយក្រែនខែកុម្ភៈ ឆ្នាំ២០១៤, តំបន់គ្រីមៀ និងទីក្រុ Sevastopol បានធ្វើប្រជាមតិមួយដែលក្នុងនោះ ៩៦.៧ ភាគរយនៃអ្នករស់នៅតំបន់គ្រីមៀ និង ៩៥.៦ ភាគរយនៃអ្នកបោះឆ្នោតនៅទីក្រុង Sevastopol បានសម្រេចជ្រើសរើសផ្តាច់ខ្លួនចេញពីអ៊ុយក្រែន ហើយចូលរួមជាមួយរុស្ស៊ី ។

ក្រោយមកប្រធានាធិបតីរុស្ស៊ី លោក វ្ល៉ាឌីមៀរ ពូទីន បានចុះហត្ថលេខាលើកិច្ចព្រមព្រៀងបង្រួបបង្រួមគ្នានៅថ្ងៃទី ១៨ ខែមីនា ឆ្នាំ២០១៤ ខណៈសភាជាន់ខ្ពស់រុស្ស៊ីបានផ្ដល់សច្ចាប័ននៅថ្ងៃទី២១ ខែមីនា ឆ្នាំ ២០១៤ ។

ទោះបីជាលទ្ធផលនៃការបោះឆ្នោតប្រជាមតិនេះមានការគាំទ្រយ៉ាងភ្លូកទឹកភ្លូកដីក៏ដោយ ក៏រដ្ឋាភិបាលទីក្រុងកៀវបានបដិសេធមិនទទួលស្គាល់តំបន់គ្រីមៀជាផ្នែកនៃប្រទេស​រុស្ស៊ីឡើយ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ ថ្ងៃនេះ ខួបកំណើតអាយុ ១០០ ឆ្នាំរបស់អ្នកការទូត អាមេរិក ដែលនៅពី​ក្រោយការទម្លាក់គ្រាប់បែកលើ កម្ពុជា