ដឹងមូលហេតុដែលទ្វារយន្តហោះរបើក ពេលកំពុងហោះហើរ កាលពីម្សិលមិញ

កាលពីចុងសប្តាហ៍នេះ យន្តហោះរបស់ក្រុមហ៊ុនអាកាសចរណ៍ Asiana Airlines បានធ្វើដំណើរពីកោះ Jeju ទៅកាន់ទីក្រុង Daegu ជាមួយនឹងអ្នកដំណើរ ១៩៤នាក់ នៅលើយន្តហោះ។ នៅពេលដែលជើងហោះហើររៀបចំចុះចត ទ្វារច្រកចេញសង្គ្រោះបន្ទាន់បានបើកភ្លាមៗ ធ្វើឱ្យអ្នកដំណើរមានការភ្ញាក់ផ្អើល និងមានអ្នកដំណើរច្រើននាក់សន្លប់រដូករណែលផងដែរ។ ជាមួយគ្នានោះអ្នកដំណើរ ១២នាក់ បានជួបមានបញ្ហាពិបាកដកដង្ហើម ខណៈក្រុមប៉ូលិសបើកការស៊ើបអង្កេត ដោយមិនបង្អង់យូរ។

មកដល់ថ្ងៃទី២៧ ខែឧសភា របាយការណ៍ពីសារព័ត៌មាន Yonhap បានឱ្យដឹងថា ប៉ូលិសកូរ៉េខាងត្បូងបានចាប់ខ្លួនបុរសម្នាក់ដែលមានអាយុ ៣០ឆ្នាំ ដោយសង្ស័យថាគាត់ជាអ្នកនៅពីក្រោយការរបើកទ្វារយន្តហោះ។ ក្នុងអំឡុងពេលសាកសួរ បុរសនោះបានប្រាប់មន្ត្រីប៉ូលិសថា គាត់ជាអ្នកបើកច្រកចេញសង្គ្រោះបន្ទាន់ ដោយសារតែគាត់មានអារម្មណ៍ថប់ដង្ហើម ហើយចង់ចុះពីយន្តហោះឱ្យបានលឿនបំផុត។

បុរស​នោះ​បាន​ប្រាប់​ប៉ូលិសទៀត​ថា​ គាត់ ​«មាន​ភាព​តានតឹង​ជា​ខ្លាំង​ បន្ទាប់​ពី​បាត់បង់​ការងារ​កាលពី​ពេល​ថ្មីៗ​នេះ​»​។ ក្រោយ​ការ​សាកសួរ​បន្ថែម ប៉ូលិសបាន​ចោទ​ប្រកាន់​គាត់​ពី​បទ​ល្មើស​ច្បាប់​សន្តិសុខ​អាកាសចរណ៍ និងកំពុងរៀបចំសំណុំរឿងបញ្ជូនទៅតុលាការ៕

ប្រែសម្រួល៖ សន្យា

ចុចអាន៖ អ្នកដំណើរសន្លប់រណែល ក្រោយជើងហោះហើរមួយរបើកទ្វារពេលកំពុងនៅលើអាកាស

ចុចអាន៖ គណបក្សចលនាឆ្ពោះទៅមុខ និងភឿថៃ ឈ្លោះគ្នាបែកផ្សែង ដណ្តើមតំណែងប្រធានសភា