នាយករដ្ឋមន្ត្រីជប៉ុន ប្រកាសបណ្តេញកូនប្រុសចេញពីតំណែង ក្រោយផ្ទុះរឿងអាស្រូវ ជប់លៀង

នាយករដ្ឋមន្ត្រីជប៉ុន លោក Kishida Fumio បានប្រកាសថា កូនប្រុសច្បងឈ្មោះ Shotaro ដែលមានតួនាទីជាលេខាផ្ទាល់របស់គាត់ នឹងត្រូវដកតំណែង បន្ទាប់ពីផ្ទុះរឿងអាស្រូវរៀបចំពិធីជប់លៀងនៅឯវិមានផ្លូវការរបស់នាយករដ្ឋមន្ត្រី កាលពីឆ្នាំមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Kishida ប្រាប់អ្នកសារព័ត៌មានកាលពីថ្ងៃចន្ទទី២៩ខែឧសភាថា លោក Kishida Shotaro នឹងលាលែងពីតំណែងនៅថ្ងៃទី១ខែមិថុនា។ គាត់នឹងត្រូវជំនួសដោយលោក Yamamoto Takayoshi ដែលធ្លាប់កាន់តំណែងនេះ ម្តងហើយ។

ទស្សនាវដ្ដី​ប្រចាំ​សប្តាហ៍​មួយ ​បានចុះផ្សាយ​កាល​ពី​សប្តាហ៍​មុន​ថា លោក​ Shotaro បាន​រៀបចំ​ពិធី​ជប់លៀង​ឆ្លង​ឆ្នាំ ​ជាមួយ​សាច់​ញាតិ​កាល​ពី​ខែ​ធ្នូ​កន្លង​ទៅ។ អ្នកចូលរួម​ បាននាំគ្នាថតរូបនៅក្នុងបន្ទប់មួយ ដែលជាធម្មតាត្រូវបានប្រើដើម្បីទទួលតែឥស្សរជនបរទេសប៉ុណ្ណោះ។ ពួកគេក៏បានធ្វើសន្និសីទសារព័ត៌មានបែបលេងសើច នៅទីនោះផងដែរ។

ពាក់ព័ន្ធរឿងនេះ លោក Kishida បានពន្យល់ថា អាកប្បកិរិយារបស់កូនប្រុសគាត់ នៅឯវិមានផ្លូវការនោះ គឺមិនសមរម្យទេ។ លោកនិយាយថា លោកយកចិត្តទុកដាក់លើករណីនេះ ព្រោះលោកជាអ្នកទទួលខុសត្រូវ ក្នុងការតែងតាំងកូនប្រុសឲ្យចូលកាន់តំណែងនេះ។

គួរបញ្ជាក់ថា លោក Fumio Kishida បានឡើងកាន់តំណែងជានាយករដ្ឋមន្ត្រីជប៉ុន និងជាប្រធានគណបក្សប្រជាធិបតេយ្យសេរី ចាប់តាំងពីឆ្នាំ ២០២១ មក៕

ប្រែសម្រួល៖ Vann Vann

ប្រភព៖ NHK

ចុចអាន៖ តម្រុយខ្លះៗនាំឲ្យជនសង្ស័យឈានដល់ការប៉ុនប៉ងធ្វើឃាតនាយករដ្ឋមន្ត្រី ជប៉ុន