ព័ត៌មានអន្ដរជាតិ

មន្ត្រីឥណ្ឌា បញ្ជាឲ្យគេបូមទឹកចេញពីអាងស្តុក ចោលអស់២០លានលីត្រ ដើម្បីរកទូរស័ព្ទរបស់ខ្លួន

បានផុស

១ year មុន

នៅ

ថ្ងៃអង្គារ ៣០ ឧសភា ២០២៣

ដោយ

មន្ត្រីរដ្ឋាភិបាលនៅភាគកណ្តាលប្រទេសឥណ្ឌា ត្រូវផ្អាកពីការងារ បន្ទាប់ពីគាត់បញ្ជាឲ្យគេបូមទឹកចេញពីអាង ដើម្បីរកទូរស័ព្ទដែលគាត់បានធ្វើឲ្យធ្លាក់ចូល ពេលកំពុងថត Selfie។

កាសែត The Times of India បានរាយការណ៍ថា មន្ត្រីផ្នែកត្រួតពិនិត្យម្ហូបអាហារឈ្មោះ Rajesh Vishwas បានជ្រុះបាត់ស្មាតហ្វូនរបស់គាត់នៅក្នុងអាងស្តុកទឹក Kherkatta ក្នុងសង្កាត់ Kanker នៃរដ្ឋ Chhattisgarh កាលពីសប្តាហ៍មុន។

ដំបូងឡើយ Vishwas បានប្រាប់ឲ្យអ្នកមុជទឹក លោតចូលទៅក្នុងអាងស្តុកទឹកដើម្បីរកទូរស័ព្ទ ដោយអះអាងថា ទូរស័ព្ទនោះ មានផ្ទុកទិន្នន័យរសើបរបស់រដ្ឋាភិបាល។ ប៉ុន្តែបន្ទាប់ពីអ្នកមុជទឹករកមិនឃើញ គាត់បានបញ្ជាឲ្យគេយកម៉ាស៊ីនម៉ាស៊ូត មកបូមទឹកចេញពីអាងឲ្យរីង។

បីថ្ងៃក្រោយមក ទឹកជាង២លានលីត្រ ត្រូវបានបូមចេញពីអាង ពោលគឺបរិមាណទឹកបែបនេះ អាចសមល្មមសម្រាប់ស្រោចស្រពលើផ្ទៃដីយ៉ាងហោចណាស់ ៦០៧ហិកតា ក្នុងអំឡុងពេលរដូវក្តៅនៅប្រទេសឥណ្ឌា។

នៅក្នុងវីដេអូ ដែលគេចែករំលែកពាសពេញប្រព័ន្ធផ្សព្វផ្សាយសង្គម លោក Vishwas ត្រូវបានគេឃើញ អង្គុយក្រោមឆ័ត្រពណ៌ក្រហម ខណៈម៉ាស៊ីនម៉ាស៊ូត បង្ហូរទឹកចេញពីអាងស្តុក។

នៅទីបំផុត ទូរស័ព្ទត្រូវបានរកឃើញ ប៉ុន្តែបើកមិនចេញទេ ព្រោះចូលទឹក។ ក្រោយមក អាជ្ញាធរបានផ្អាកការងារលោក Vishwas បន្ទាប់ពីគាត់រងការរិះគន់យ៉ាងចាស់ដៃចំពោះការខ្ជះខ្ជាយធនធានទឹក៕

សូមទស្សនាវីដេអូ៖