អាថ៌កំបាំងប្រឡាយទឹកក្រោមស្ពានរីយ៉ាល់តូប្រែពណ៌បៃតង ត្រូវបានលាតត្រដាង

អាជ្ញាធរប្រចាំតំបន់បានទម្លាយមូលហេតុដែលធ្វើឲ្យប្រឡាយទឹកក្រោមស្ពានរីយ៉ាល់តូ នៅទីក្រុង Venice ប្រែពណ៌បៃតង កាលពីថ្ងៃទី ២៨ ខែឧសភា ។ តាមពិតបញ្ហានេះមិនមែនបណ្ដាលមកពីការបាតុកម្ម ឬប្រឆាំងនយោបាយអ្វីឡើយ ប៉ុន្តែវាកើតឡើងដោយសារសមាសធាតុម្យ៉ាងដែលគេប្រើសម្រាប់តេស្តប្រព័ន្ធទឹកស្អុយប៉ុណ្ណោះ ។

ទីភ្នាក់ងារតំបន់សម្រាប់ការបង្ការ និងការពារបរិស្ថាននៃទីក្រុង Veneto បាននិយាយពីការប្រទះឃើញសមាសធាតុ Fluorescein ក្នុងគំរូទឹកដោយគ្មានប្រភពច្បាស់លាស់ ។ យ៉ាងណាការពិសោធន៍មិនមានរកឃើញសារធាតុពុលក្នុងសមាសធាតុ Fluorescein ទេ ដូច្នេះហេតុការណ៍នេះត្រូវបានបញ្ចប់ដោយគ្មានមន្ទិលសង្ស័យ ឬករណីគ្រោះថ្នាក់សូម្បីតែមួយ ។

ត្រឡប់ទៅកាន់ឆ្នាំ ១៩៦៨ វិញ ក៏ធ្លាប់មានករណីស្រដៀងនេះបានកើតឡើងដែរ ពេលនោះសិល្បករអាហ្សង់ទីនឈ្មោះ Nicolas Garcia Uriburu បានប្រើសមាសធាតុ Fluorescein ដើម្បីប្រែពណ៌ទឹក ក្នុងគោលបំណងបង្កើនការយល់ដឹងពីបរិស្ថាន នៅប្រឡាយធំអំឡុងពិធីបុណ្យ Venice Biennale លើកទី ៣៤ ៕

ប្រភព ៖ dailymail

ចុចអាន ៖ នៅសុខៗស្រាប់តែប្រឡាយទឹកក្រោមស្ពានរីយ៉ាល់តូ ប្រែពណ៌បៃតងយ៉ាងអាថ៌កំបាំង