ស្ត្រីកូរ៉េវ័យ ២០ឆ្នាំ សម្លាប់គ្រូបង្រៀនម្នាក់ និងច្រៀកសាកសពច្រកកាបូបទៅចោលមាត់ទន្លេ

នៅថ្ងៃទី៣០ ខែឧសភា ឆ្នាំ២០២៣ ស្ត្រីជនជាតិកូរ៉េខាងត្បូងម្នាក់ ដែលមានអាយុ ២០ឆ្នាំត្រូវបានប៉ូលិសចាប់ខ្លួនក្រោមការចោទប្រកាន់ពីបទមនុស្សឃាត និងបោះចោលសាកសព។

ដើមហេតុរហូតនាំឱ្យមានឃាតកម្មកើតឡើង ទំនងមកពីជនដៃដល់ជាមនុស្សមានបញ្ហាផ្លូវចិត្ត ខណៈហេតុការណ៍ដំបូងផ្ដើមចេញតាមរយៈ App បង្រៀនមួយ។ ដំបូងឡើយជនរងគ្រោះបានចុះឈ្មោះជាគ្រូបង្រៀន ចំណែកជនដៃដល់អះអាងថា ខ្លួនជាឪពុកម្តាយសិស្សវិទ្យាល័យ ហើយកំពុងស្វែងរកគ្រូបង្រៀនម្នាក់អាយុប្រហែលជាង ២០ឆ្នាំ។

ជាការពិត App បង្រៀន តម្រូវឱ្យគ្រូពិនិត្យ និងកំណត់អត្តសញ្ញាណប៉ាម៉ាក់ឬអាណាព្យាបាលឱ្យបានហ្មត់ចត់ ប៉ុន្តែជាក់ស្ដែង App មិនអាចអនុវត្តវិធានការត្រួតពិនិត្យតឹងរ៉ឹងនោះទេ ទើបជនរងគ្រោះមិនស្គាល់អត្តសញ្ញាណពិតរបស់ជនដៃដល់។ បន្ទាប់ពីជជែកគ្នា ​ជន​រង​គ្រោះ​បានបដិសេធ​ថា អាស័យដ្ឋាន​ជនដៃដល់​នៅ​ឆ្ងាយ​ពី​នាង​ពេក ហើយនាងមិនអាចទៅបង្រៀនបានឡើយ។ ភ្លាមៗជនដៃដល់​បាន​ស្នើ​សុំបញ្ជូន​កូន​ទៅ​ផ្ទះ​ជន​រង​គ្រោះ​ជំនួស​វិញ ហើយជនរងគ្រោះក៏យល់ព្រម និងឱ្យ​អាសយដ្ឋាន​របស់​ខ្លួនទៅជនដៃដល់។

ក្រោយព្រមព្រៀងគ្នា និងផ្ញើអាសយដ្ឋានរួច ជនដៃដល់បានទៅផ្ទះជនរងគ្រោះ នៅថ្ងៃដដែលវេលាម៉ោង ៥:៣០ល្ងាច ក្នុងសង្កាត់ Geumjeong-gu ក្នុងទីក្រុង Busan ។ លុះ​ចូល​ដល់​ផ្ទះ​ជន​រង​គ្រោះ ជនដៃដល់​បាន​កាប់​ជន​រង​គ្រោះ​ដោយ​កាំបិតរហូតដល់ស្លាប់ និងពុះច្រៀកសាក​សព​ជាបំណែក។ ក្រោយធ្វើសកម្មភាព ជនដៃដល់​បាន​យកបំណែកសាកសព​ដាក់ច្រកចូល​កាបូប និង​ធ្វើ​ដំណើរតាមតាក់ស៊ី​យក​ទៅ​ចោល​ក្បែរ​ព្រៃ​មាត់​ទន្លេ​ នៅព្រឹក​បន្ទាប់។ ដោយឃើញសកម្មភាពគួរឱ្យសង្ស័យ អ្នកបើកតាក់ស៊ីបានរាយការណ៍ទៅកាន់ប៉ូលិស។

នៅ​ព្រឹក​ថ្ងៃ​ទី​២៧ ខែ​ឧសភា ឆ្នាំ​២០២៣ ប៉ូលិសបានចុះទៅ​ត្រួត​ពិនិត្យ​សព​ជនរងគ្រោះ ​ហើយ​ចាប់​ជនដៃដល់​បាន​ភ្លាមៗ។ បំណែកសាកសព​នៅ​សេសសល់​ត្រូវ​បាន​គេ​រក​ឃើញ​នៅ​ផ្ទះ​របស់​នាង។ ប៉ូលិស​បាន​បញ្ជាក់​ថា អំពើ​ឃាតកម្ម​នេះ​ហាក់​ដូច​ជា​ពុំមាន​ហេតុផលច្បាស់លាស់ ឬជាក់លាក់ក្នុង​ការ​សម្លាប់​នោះ​ទេ ហើយ​ក្រុមជំនាញបាន​សន្និដ្ឋានបឋម​ថា ជនដៃដល់​ជាមនុស្ស​វិកលចរិត៕

ប្រែសម្រួល៖ សន្យា

ប្រភព៖ Koreaboo