យន្តហោះចារកម្មអាមេរិក ប៊ិះបុក យន្តហោះចម្បាំងចិន លើសមុទ្រចិនខាងត្បូង

កាលពីសប្តាហ៍មុន យន្តហោះចារកម្មអាមេរិក ដែលហោះក្នុងដែនអាកាសអន្តរជាតិលើសមុទ្រចិនខាងត្បូង ប៊ិះនឹងបុកជាមួយយន្តហោះចម្បាំងចិន ខណៈដែលមន្ត្រីអាមេរិកអះអាងថាជា ការស្ទាក់ចាប់ដោយមិនមានជំនាញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេបញ្ជាការឥណ្ឌូប៉ាស៊ីហ្វិកអាមេរិក (INDOPACOM) បានចោទប្រកាន់កាលពីថ្ងៃអង្គារ ទី៣០ ខែឧសភាថា អ្នកបើកយន្តហោះចិនបានធ្វើសមយុទ្ធ “ឈ្លានពានដែលមិនចាំបាច់” ដោយបានបើកយន្តហោះចម្បាំង J-16 នៅពីមុខយន្តហោះឈ្លបយកការណ៍ RC-135 របស់សហរដ្ឋអាមេរិក។

ទីបញ្ជាការ បានបង្ហោះវីដេអូឃ្លីបនៃឧបទ្ទវហេតុនេះ ដោយបង្ហាញឲ្យឃើញយន្តហោះ J-16 ហោះកាត់មុខយន្តហោះអាមេរិក និងធ្វើឲ្យកាប៊ីនរបស់ RC-135 រង្គើ។

INDOPACOM និយាយថា យន្តហោះ RC-135 កំពុងធ្វើប្រតិបត្តិការប្រកបដោយសុវត្ថិភាព និងជាប្រចាំនៅលើសមុទ្រចិនខាងត្បូង ក្នុងដែនអាកាសអន្តរជាតិ ស្របតាមច្បាប់អន្តរជាតិ។ សហរដ្ឋអាមេរិកនឹងបន្តហោះហើរ និងធ្វើប្រតិបត្តិការ ប្រកបដោយសុវត្ថិភាព និងការទទួលខុសត្រូវ នៅគ្រប់ទីកន្លែងដែលច្បាប់អន្តរជាតិអនុញ្ញាត។

ទោះបីជាយ៉ាងណាក៏ដោយ មន្ត្រី​ចិន​មិន​បាន​ធ្វើ​អត្ថាធិប្បាយ​ភ្លាមៗ​អំពី​ឧប្បត្តិហេតុ​នេះ ឬ​សេចក្តីថ្លែងការណ៍​របស់​អាមេរិក​ទេ។ នាពេលកន្លងមក រដ្ឋាភិបាលក្រុងប៉េកាំង ក៏បានច្រានចោលចំពោះការអះអាងរបស់ទីក្រុងវ៉ាស៊ីនតោន ជុំវិញឧប្បត្តិហេតុស្រដៀងគ្នានេះផងដែរ ដោយចោទប្រកាន់កងកម្លាំងអាមេរិកពីការបង្កហេតុ និងរំលោភលើអធិបតេយ្យរបស់ចិន។

គួរបញ្ជាក់ថា ភាពចម្រូងចម្រាសចុងក្រោយនេះ កើតឡើងចំពេលដែលភាពតានតឹងរវាងសហរដ្ឋអាមេរិក និងចិន កើនឡើងដល់ចំណុចខ្ពស់ថ្មី។

មន្ត្រីចិនបានកាត់ផ្តាច់ទំនាក់ទំនងផ្នែកការពារជាតិ និងអាកាសធាតុ ជាមួយសហរដ្ឋអាមេរិកកាលពីខែសីហាឆ្នាំមុន ដោយលើកឡើងពីការបង្កហេតុនៅក្នុងច្រកសមុទ្រតៃវ៉ាន់ ហើយរដ្ឋបាលរបស់លោកប្រធានាធិបតី ចូ បៃដិន បានបាញ់ទម្លាក់បាឡុងដែលសង្ស័យយកការណ៍ឲ្យចិននៅឯឆ្នេរសមុទ្រ South Carolina ក្នុងខែកុម្ភៈ៕

ប្រែសម្រួល៖ Vann Vann

ប្រភព៖ RT

ចុចអាន៖ អាមេរិក រៀបចំ ផែនការ យោធា ដើម្បីការពារលោកស្រី Pelosi ពេលធ្វើទស្សនកិច្ច តៃវ៉ាន់