ព័ត៌មានអន្ដរជាតិ

ប្រតិបត្តិការវាយលុករបស់អ៊ុយក្រែន ទទួលបានផ្លែផ្កា នៅភាគខាងកើត

បានផុស

២ years មុន

នៅ

ថ្ងៃអង្គារ ៦ មិថុនា ២០២៣

ដោយ

អនុរដ្ឋមន្ត្រីការពារជាតិអ៊ុយក្រែន លោកស្រី Hanna Malyar និយាយថា កងកម្លាំងរបស់ទីក្រុងកៀវ កំពុងបើកប្រតិបត្តិការវាយលុកនៅក្នុងតំបន់មួយចំនួន ជាពិសេសនៅទីក្រុង Bakhmut ភាគខាងកើត ។

អនុរដ្ឋមន្ត្រីការពារជាតិអ៊ុយក្រែន លោកស្រី Hanna Malyar (រូបថត៖ Kharkivoda.gov.ua)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ យោងតាមប្រភពយោធាអ៊ុយក្រែនបានប្រាប់ BBC ថា ប្រតិបត្តិការវាយលុកដោយប្រើរថពាសដែកខ្នាតតូច កំពុងដំណើរការ។

ទោះបីជាយ៉ាងណាក៏ដោយ ប្រភពមិនបាននិយាយទេថាតើ នេះគឺជាការចាប់ផ្តើមនៃប្រតិបត្តិការវាយលុកពេញទំហឹង ដែលគេរង់ចាំជាយូរមកហើយរបស់អ៊ុយក្រែន មែនឬក៏អត់នោះទេ ប៉ុន្តែលោកស្រី Malyar បានចាត់ទុកទីក្រុង Bakhmut ភាគខាងកើតថាជា “ចំណុចកណ្តាលនៃអរិភាព”។

ពាក់ព័ន្ធនឹងបញ្ហានេះដែរកាលពីល្ងាចថ្ងៃចន្ទ ទី៥ ខែមិថុនា លោកស្រីនិយាយថា កងទ័ពអ៊ុយក្រែន វាយយកបានទឹកដីរហូតដល់ទៅ ១.៦ គីឡូម៉ែត្រក្នុងទិសដៅជាច្រើននៅជុំវិញទីក្រុង ខណៈកងកម្លាំងរុស្ស៊ី ក៏ស្ថិតលើផ្នែកការពារនៅភាគខាងត្បូងផងដែរ ។

ស្របពេលជាមួយគ្នានោះ មេបញ្ជាការកងទ័ពជើងគោកអ៊ុយក្រែន លោកឧត្តមសេនីយ៍ Oleksandr Syrskyi ក៏បាននិយាយផងដែរថា កងទ័ពកំពុងវាយឆ្ពោះទៅមុខ សំដៅទៅទីក្រុង Bakhmut ហើយបានបំផ្លាញទីតាំងរបស់រុស្ស៊ីនៅជិតទីក្រុងនេះ ។

គួរបញ្ជាក់ថា អស់រយៈពេលជាច្រើនខែមកហើយ ទីក្រុង Bakhmut បានក្លាយជាចំណុចស្នូលនៃការប្រយុទ្ធគ្នាយ៉ាងខ្លាំងក្លា រវាងកងកម្លាំងអ៊ុយក្រែន និងរុស្ស៊ី ស្របពេលដែលក្រុមទាហានស៊ីឈ្មួលរុស្ស៊ី Wagner ក៏បានអះអាងដណ្តើមយកទីក្រុងនេះ ប៉ុន្តែទោះយ៉ាងណា នៅប៉ុន្មានសប្តាហ៍ចុងក្រោយ អ្នកវិភាគមួយចំនួនបានលើកឡើងថា កងកម្លាំងរបស់ទីក្រុង កៀវ កំពុងព្យាយាមឡោមព័ទ្ធ Bakhmut និងដាក់អន្ទាក់អង្គភាពរុស្ស៊ីផងដែរ ៕

ប្រែសម្រួល៖ Vann Vann

ប្រភព៖ BBC

ចុចអាន៖ អ៊ុយក្រែន ចាប់ផ្តើមការវាយលុកទ្រង់ទ្រាយធំ លើ រុស្ស៊ី