លោក Pita មិនត្រឹមតែជាអនាគតនាយករដ្ឋមន្ត្រីថៃប៉ុណ្ណោះទេ ថែមទាំងល្បីលើអនឡាញធ្វើអ្វីក៏មានអ្នកតាម

ក្រោយជ័យជម្នះដ៏គួរឲ្យភ្ញាក់ផ្អើលរបស់គណបក្សចលនាឆ្ពោះទៅមុខ លោក Pita Limjaroenrat ត្រូវ​សាធារណជន​ចាប់អារម្មណ៍ខ្លាំងលើរូបរាងសង្ហា​ សូម្បី​តែ​សំលៀកបំពាក់​និងកាយវិការ​របស់មេដឹកនាំរូបនេះ​បានក្លាយជាអ្នកមាន​ឥទ្ធិពល​ខ្លាំងលើបណ្ដាញសង្គម។

កាលពី​ថ្មីៗនេះ​លោក​បាន​បង្ហាញខ្លួននៅលើ Ruanglao Chaonee កម្មវិធីពេលព្រឹករបស់ប៉ុស្តិ៍លេខ ៣ ​ដោយ​អ្នកកាសែត​ជើងចាស់​លោក Sorayuth Sutassanachinda បាន​សម្ភាសន៍​ផ្ទាល់ពី​ចំណង់ចំណូលចិត្ត​របស់​មេដឹកនាំ​គណបក្សចលនាឆ្ពោះ (MFP)។

ក្នុងអំឡុងពេល​សម្ភាសន៍​លោក Pita បានប្រាប់អ្នកទស្សនាអំពី​ភេសជ្ជៈ​ដែល​ខ្លួន​និយម​ចូលចិត្ត​​ថា លោក​ចាប់ផ្ដើម​ពេល​ព្រឹក​ជាមួយ​នឹង​កាហ្វេខ្មៅ​ ​ហើយផឹកសូដា​ក្រូចឆ្មារ​នៅ​ពេលរសៀល។ ចំណែក​ពេលល្ងាច​បន្តិច​ទើប​ផឹកស្រាមួយប្រភេទឈ្មោះ Kao Na liquor។

លោក​មានប្រសាសន៍​បន្ថែម​ទៀត​ថា “នៅពេលយប់ខ្ញុំចូលចិត្តផឹកស្រាវីស្គីប្រភេទ Sangvein Rum ធ្វើពីអំពៅ” ដោយបញ្ចាក់បន្ថែមថា​​ គួរ​តែ​បន្ថែមតម្លៃដល់​អំពៅក្នុងស្រុក ហើយរដ្ឋាភិបាល​របស់លោកមានចេតនាជំរុញស្រាក្នុង​ស្រុកនៅ​ក្រៅប្រទេស។

បន្ទាប់ពីការ​សំភាសន៍ចប់ភ្លាម ​អ្នកលេង​អ៊ីនធឺណេត​ជាច្រើនបាននិយាយអំពី Sangvein និងម៉ាកយីហោផ្សេងទៀតដែលបានលើកឡើងនៅពេលពួកគេចង់ភ្លក់រសជាតិនោះដែរ។ ក្រោយមកមិនបានបីម៉ោងផង ​​ទំព័រហ្វេសប៊ុកដែលលក់​ស្រា​បានសរសេរថា “ជាបន្ទាន់ !!!! រោងចក្រនិយាយថា Sangvein អស់​ស្តុក​ហើយ”។

ទោះយ៉ាងណាក៏ដោយ អ្នកលេងអ៊ីនធឺណេតជាច្រើនបានដាក់ឈ្មោះ​លោក Pita ថាជាទូតសុឆន្ទៈ​ដ៏ល្អបំផុតនិង​អ្នកលក់ដែលមិនធ្លាប់​មាន។ ការសន្យាស្នាដៃដ៏ពេញនិយម​របស់គណបក្សរបស់គាត់ ​គឺដើម្បីធ្វើសេរីភាវូបនីយកម្មការផលិតស្រា​និង​អនុញ្ញាត​ឲ្យ​អ្នកផលិត​តូច​បន្ថែមចូលទីផ្សារ។

ក្រោយមកទៀតលោក Pita បានបង្ហាញខ្លួននៅក្នុងបទសម្ភាសន៍ជាមួយហ្គីតាសដែលមានឈ្មោះថា Laba Lava Touch និងបានលេងហ្គីតាហើយច្រៀងចម្រៀងពីរបីបទ។ ត្បិតថាវីដេអូរបស់គាត់​ច្រៀងស្រពេចស្រពិល តែលោកបែរទទួលបាន​ការចូលចិត្តនិងចែករំលែករាប់ពាន់នៅលើវេទិកាប្រព័ន្ធផ្សព្វផ្សាយ​សង្គម។

លើសពីនេះទៀត ​សំលៀកបំពាក់​របស់លោកក្នុងក្បួនដង្ហែ​នៅទីក្រុងបាងកក​បានទាក់ទាញចំណាប់អារម្មណ៍របស់​សាធារណជន​ជាពិសេស។ គាត់បានធ្វើឲ្យ​មនុស្សជា​ច្រើន​បានភ្ញាក់ផ្អើលយ៉ាងខ្លាំង​​ ​ព្រោះគាត់តែងតែ​ស្លៀក​ឈុត​អាវធំ​ពណ៌​ស​ឬខៀវ។ បន្ទាប់មក បានបង្ហាញខ្លួននៅក្នុងព្រឹត្តិការណ៍ដដែលដោយស្លៀកអាវសូត្រ Paul Smith Swirl ដែលហាក់ដូចជាសមនឹង​ប្រធានបទ​ឥន្ធនូ​នៃព្រឹត្តិការណ៍​ ខណៈមនុស្សជាច្រើនអាចមានលទ្ធភាពទិញអាវមកពាក់ឲ្យមានទំនុកចិត្តដូចលោក Pita ដែរ៕

ប្រែសម្រួល៖ សាង ស្រីល័ក្ខ

ប្រភព៖Thai PBS

ចុចអាន៖អតីតមេប៉ូលិស ថៃ ជំរុញឲ្យសមាជិកព្រឹទ្ធសភាបោះឆ្នោតជូនលោក Pita ធ្វើជានាយករដ្ឋមន្ត្រី

ចុចអាន៖ថៃ អនុញ្ញាតឲ្យអ្នកធ្វើការរដ្ឋ ឈប់សម្រាក១៥ថ្ងៃ ក្រោយភរិយាសម្រាលកូន