គម្រោងវិលចូលស្រុករបស់លោក ថាក់ស៊ីន មិនផ្លាស់ប្តូរឡើយ តែអាស្រ័យលើស្ថានភាព

អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត្រា នៅតែគ្រោងវិលត្រលប់ចូលស្រុកវិញ នៅខែកក្កដាខាងមុខ ប៉ុន្តែរឿងរ៉ាវគឺអាស្រ័យលើស្ថានភាពនៅក្នុងប្រទេស។ នេះបើតាមការបញ្ជាក់ពីកូនស្រីរបស់គាត់គឺលោកស្រី Paetongtarn Shinawatra នៅថ្ងៃពុធទី៧ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Paetongtarn បានលើកឡើងនៅឯទីស្នាក់ការកណ្តាលគណបក្សភឿថៃថា លោក ថាក់ស៊ីន កំពុងរៀបចំសម្រាប់ការវិលត្រលប់ចូលស្រុក ហើយនេះអាចមានទំនាក់ទំនងជាមួយភ្នាក់ងាររដ្ឋាភិបាលដែលជាប់ពាក់ព័ន្ធ។

លោកស្រី Paetongtarn និយាយថា គ្រួសាររបស់លោកស្រី ក៏កំពុងរៀបចំផងដែរ ឲ្យការវិលត្រលប់របស់លោក ថាក់ស៊ីន មានភាពងាយស្រួលនិងសុវត្ថិភាព។ លោក​ស្រី​​បន្ត​ថា​ “​យើងបានរៀបចំវិធី​ជា​ច្រើនសម្រាប់ការទទួលគាត់ ដោយ​សារយើង​មិន​ដឹង​ថាតើ​នឹង​ត្រូវ​ការ​អ្វីខ្លះ​ឬ​នឹងមានអ្វី​កើត​ឡើង​”។ 

លើសពីនេះ លោកស្រីបន្ថែមថា ក្រុមគ្រួសារក៏កំពុងរង់ចាំការណែនាំពីលោកថាក់ស៊ីនផងដែរ អំពីអ្វីដែលគួរធ្វើ ដើម្បីត្រៀមខ្លួនសម្រាប់ការវិលត្រលប់របស់គាត់។ សម្រាប់ពេលនេះ កាលវិភាគសម្រាប់ការត្រលប់របស់គាត់នៅតែមិនផ្លាស់ប្តូរក្នុងខែកក្កដា។ ​យ៉ាង​ណា វា​ក៏​អាស្រ័យ​លើ​ស្ថានភាព​នយោបាយ​និងប្រទេស​ជាតិដែរ។

គួរបញ្ជាក់ជាថ្មី លោកថាក់ស៊ីន ត្រូវបានផ្ដួលរំលំដោយរដ្ឋប្រហារយោធានៅថ្ងៃទី១៩ខែកញ្ញាឆ្នាំ២០០៦ ខណៈពេលគាត់នៅក្រៅប្រទេស។ ចាប់តាំងពីពេលនោះមក គាត់បានរស់នៅក្នុងការនិរទេសខ្លួនឯង៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ លោក ថាក់ស៊ីន បញ្ជាក់ច្បាស់ៗពីពេលវេលាវិលត្រឡប់ចូលស្រុកវិញ