ដូណាល់ ត្រាំ ថា កាលជំនាន់លោកកាន់តំណែង អាមេរិកមានគ្រាប់រំសេវច្រើនណាស់ តែឥឡូវ សល់តិចបំផុត

អតីតប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃអាទិត្យ ទី១១ ខែមិថុនាថា ជំនួយយោធាដល់ប្រទេសអ៊ុយក្រែន ធ្វើឲ្យស្តុកគ្រាប់រំសេវរបស់អាមេរិក លែងមានដូចមុនហើយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់អ្នកសាធារណរដ្ឋក្នុងរដ្ឋ Georgia, លោក ត្រាំ ​និយាយ​ថា “​ឥឡូវ​ យើង​មិន​មាន​គ្រាប់​ទេ​ បែរជាអ៊ុយក្រែនទៅវិញដែល​មាន​គ្រាប់”​។

លោកកត់សម្គាល់ថា កាលពីជំនាន់លោកកាន់តំណែងជាប្រធានាធិបតី សហរដ្ឋអាមេរិក មានគ្រាប់ច្រើនណាស់ តែឥឡូវនេះ យើងមានគ្រាប់តិចតួចបំផុតដើម្បីការពារខ្លួន។

ស្របពេលជាមួយគ្នានោះ អតីតប្រធានាធិបតីរូបនេះ ក៏បានប្តេជ្ញាដែរថា លោកនឹងនាំសន្តិភាពជូនរុស្ស៊ីនិងអ៊ុយក្រែន ក្នុងរយៈពេលត្រឹម២៤ម៉ោងប៉ុណ្ណោះ ប្រសិនបើលោកជាប់ឆ្នោតជាប្រធានាធិបតីម្តងទៀត នៅឆ្នាំក្រោយ។

លើសពីនេះ លោកអះអាងថា​ លោកគឺជាបេក្ខជនតែមួយគត់ ដែលអាចធ្វើតាមការសន្យានេះបាន ហើយថា លោកនឹងការពារសង្គ្រាមលោកលើកទី៣ មិនឲ្យផ្ទុះឡើងឡើយ ។

សេចក្តីប្រកាសរបស់លោក ត្រាំ កើតឡើងបន្ទាប់ពី ក្រសួងការពារជាតិអាមេរិក និយាយថា ទីក្រុងវ៉ាស៊ីនតោន នឹងផ្តល់កញ្ចប់ជំនួយយោធាក្នុងទំហំទឹកប្រាក់ ២.១ ពាន់លានដុល្លារ ឲ្យអ៊ុយក្រែន ដែលរួមមានទាំងគ្រាប់សម្រាប់ប្រព័ន្ធការពារដែនអាកាស ក៏ដូចជាមីស៊ីល និងប្រព័ន្ធរ៉ុកកែតឡាស៊ែរផងដែរ៕

ប្រែសម្រួល៖ Vann Vann

ប្រភព៖ Sputnik

ចុចអាន៖ លោក ដូណាល់ ត្រាំ ត្រូវតុលាការចោទ ពីបទ កាន់កាប់ឯកសារសម្ងាត់