ព័ត៌មានអន្ដរជាតិ

មកស្គាល់ច្បាស់ ពីស្តេចនយោបាយអ៊ីតាលី លោក Silvio Berlusconi

បានផុស

២ years មុន

នៅ

ថ្ងៃអង្គារ ១៣ មិថុនា ២០២៣

ដោយ

អតីតនាយករដ្ឋមន្ត្រីអ៊ីតាលី លោក Silvio Berlusconi បានទទួលមរណភាពក្នុងអាយុ ៨៦ឆ្នាំ ដោយសារជំងឺមហារីកឈាម កាលពីថ្ងៃចន្ទទី១២ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មហាសេដ្ឋីប្រព័ន្ធផ្សព្វផ្សាយរូបនេះ បានដឹកនាំរដ្ឋាភិបាលអ៊ីតាលីចំនួនបីលើក ចន្លោះឆ្នាំ១៩៩៤ ដល់២០១១ ហើយគណបក្ស Forza Italia របស់គាត់ គឺជាដៃគូនៅក្នុងក្រុមចម្រុះដែលកំពុងកាន់អំណាច។

លោក Berlusconi គឺជាអ្នកនយោបាយលេចធ្លោបំផុតរបស់ប្រទេសអ៊ីតាលី ថ្វីបើអាជីពរបស់គាត់ ត្រូវញាំញីដោយសាររឿងអាស្រូវផ្លូវភេទ ការចោទប្រកាន់រាប់មិនអស់ពាក់ព័ន្ធអំពើពុករលួយ និងការផ្តន្ទាទោសពីបទក្លែងបន្លំពន្ធក៏ដោយ។

បុរសមានរហស្សនាមស្តេចនយោបាយរូបនេះ បានទទួលមរណភាព នៅមន្ទីរពេទ្យ San Raffaele ក្នុងទីក្រុង Milan ដែលនៅទីនោះ លោកបានចំណាយពេល៦សប្តាហ៍ ដើម្បីព្យាបាលមេរោគសួត ទាក់ទងនឹងជំងឺមហារីកឈាមរ៉ាំរ៉ៃ។

កើតក្នុងគ្រួសារវណ្ណៈកណ្តាលនៅទីក្រុង Milan នាឆ្នាំ១៩៣៦, លោក Berlusconi បានចាប់ផ្តើមអាជីពជំនួញលើវិស័យអចលនទ្រព្យ មុនពេលទៅបង្កើតក្រុមហ៊ុន Mediaset ដែលជាអ្នកផ្សាយពាណិជ្ជកម្មធំបំផុតរបស់ប្រទេសអ៊ីតាលី។ លោកក៏ជាម្ចាស់ក្លិបបាល់ទាត់ AC Milan ចន្លោះឆ្នាំ ១៩៨៦ ដល់ឆ្នាំ២០១៧ផងដែរ។

គណបក្ស Forza Italia ត្រូវបានបង្កើតឡើងក្នុងឆ្នាំ១៩៩៣ ហើយមួយឆ្នាំក្រោយមក លោក Berlusconi បានក្លាយជានាយករដ្ឋមន្ត្រីដំបូងគេ ដែលជាប់ឆ្នោតទាំងមិនធ្លាប់កាន់តំណែងណាមួយសោះពីមុនមក ហើយក្នុងការចូលកាន់តំណែងអាណត្តិទីពីរចន្លោះឆ្នាំ២០០១ដល់២០០៦ លោកបានក្លាយជាមេដឹកនាំអ៊ីតាលី កាន់អំណាចយូរជាងគេ ចាប់តាំងពីសង្គ្រាមលោកលើកទី២មក។

លោកបានឡើងកាន់អំណាចសាជាថ្មីក្នុងឆ្នាំ២០០៨ ប៉ុន្តែត្រូវបង្ខំចិត្តលាលែងពីតំណែងវិញនៅឆ្នាំ២០១១ ចំពេលមានវិបត្តិបំណុលធ្ងន់ធ្ងរ។

លោក Berlusconi ត្រូវបានកាត់ទោសពីបទក្លែងបន្លំពន្ធនៅចុងឆ្នាំ២០១២។ ក្រោយមក បម្រាមឈរឈ្មោះបោះឆ្នោតរបស់គាត់ ត្រូវបានដកចេញទាន់ពេលសម្រាប់ការបោះឆ្នោតសកលឆ្នាំ២០១៨ ពេលដែលគណបក្ស Forza Italia ចូលរួមនៅក្នុងក្រុមចម្រុះជាមួយគណបក្ស League និង Brothers of Italy ប៉ុន្តែមិនទទួលបានសំឡេង ៤០% តាមដែលត្រូវការដើម្បីគ្រប់គ្រងអំណាចនោះទេ។

នៅឆ្នាំ២០១៩ លោក Berlusconi បានឈ្នះអាសនៈនៅក្នុងសភាអឺរ៉ុប ហើយនៅក្នុងការបោះឆ្នោតសកលខែតុលាឆ្នាំ២០២២ គណបក្សរបស់លោក បានវិលត្រលប់មកកាន់អំណាចវិញនៅក្នុងក្រុមចម្រុះដែលដឹកនាំដោយគណបក្ស Brothers of Italy របស់លោកស្រី Giorgia Meloni។ Berlusconi ក៏ត្រូវបានបោះឆ្នោតជ្រើសរើសជាសមាជិកព្រឹទ្ធសភាផងដែរ។

លោកបានរៀបការពីរដង ហើយមានទំនាក់ទំនង៧ឆ្នាំជាមួយ Francesca Pascale អាយុ ៣៧ឆ្នាំ មុនពេលទាក់ទងជាមួយ Marta Fascina អាយុ៣៣ឆ្នាំ ដែលជាសមាជិកសភាគណបក្ស Forza Italia ហើយក្នុងជីវិតគ្រួសារនោះ លោកមានកូនចំនួន៥នាក់ ៕

ប្រែសម្រួល៖ Vann Vann

ចុចអាន៖ អតីតនាយករដ្ឋមន្ត្រីអ៊ីតាលី លោក Silvio Berlusconi ទទួលមរណភាព