គីម ជុងអ៊ុន ប្តេជ្ញា ពួតដៃជាមួយ ពូទីន ដើម្បីសម្រេចគោលដៅធំ

មេដឹកនាំកូរ៉េខាងជើង លោក គីម ជុងអ៊ុន បានប្តេជ្ញាថា នឹងពួតដៃជាមួយប្រធានាធិបតីរុស្ស៊ី លោក វ្ល៉ាឌីមៀរ ពូទីន ក្នុងគោលបំណងបន្តពង្រឹងទំនាក់ទំនងរវាងប្រទេសទាំងពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសារអបអរសាទរទិវាជាតិរុស្ស៊ី មេដឹកនាំកូរ៉េខាងជើង បានបង្ហាញការគាំទ្រពេញទំហឹង និងសាមគ្គីភាព ចំពោះការសម្រេចចិត្តរបស់លោកពូទីន ក្នុងការវាយលុកប្រទេសអ៊ុយក្រែន។

នៅក្នុងសារដែលចេញផ្សាយដោយសារព័ត៌មាន KCNA, លោក គីម និយាយថា “យុត្តិធម៌​ប្រាកដ​ជា​ឈ្នះ ហើយ​​រុស្ស៊ី ​នឹង​បន្ថែម​ភាព​រុងរឿង​ ទៅក្នុង​ប្រវត្តិសាស្ត្រ​នៃ​ជ័យជម្នះ”។

KCNA បន្តថា លោក គីម បានប្តេជ្ញាថានឹងពួតដៃយ៉ាងរឹងមាំ ជាមួយប្រធានាធិបតីរុស្ស៊ី ស្របតាមបំណងប្រាថ្នារួមរបស់ប្រជាជននៃប្រទេសទាំងពីរ ដើម្បីសម្រេចបាននូវគោលដៅធំ នៃការកសាងប្រទេសដ៏មានឥទ្ធិពលមួយ។

គួរបញ្ជាក់ជាថ្មី, ប្រទេសកូរ៉េខាងជើង គឺស្ថិតនៅខាង​រុស្ស៊ី ក្នុងប្រតិបត្តិការវាយលុកប្រទេសអ៊ុយក្រែន ហើយបានស្តីបន្ទោសខ្លាំងៗលើគោលនយោបាយអនុត្តរភាពនិងការប្រើអំណាចហួសហេតុ របស់សហរដ្ឋអាមេរិក និងលោកខាងលិច។

នៅក្នុងសេចក្តីថ្លែងការណ៍ផ្លូវការជាលើកដំបូង ប៉ុន្មានថ្ងៃបន្ទាប់ពីការលុកលុយនោះ ក្រសួងការបរទេសកូរ៉េខាងជើង និយាយថា ប្រទេសលោកខាងលិច មានទោសពីបទរំលោភអំណាច។

លើសពីនេះ​ កូរ៉េខាងជើងបានចោទប្រកាន់ទីក្រុងវ៉ាស៊ីនតោន និងសម្ព័ន្ធមិត្តរបស់ខ្លួនថា មិនអើពើនឹងការទាមទារសមហេតុផល និងស្របច្បាប់ពីរុស្ស៊ីសម្រាប់ការធានាការធានាសន្តិសុខ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ អាមេរិក ព្រមាន កូរ៉េខាងជើង ជុំវិញការបាញ់បង្ហោះផ្កាយរណប