ភ្លើងឆេះព្រៃ២០៨កន្លែងនៅកាណាដា កំពុងកញ្ជ្រោលខ្លាំង គ្រប់គ្រងមិនបាន

បច្ចុប្បន្ន មានភ្លើងឆេះព្រៃសកម្មចំនួន៤៣១កន្លែង កំពុងឆេះនៅទូទាំងប្រទេសកាណាដា ​ហើយក្នុងនោះ មាន២០៨កន្លែង កំពុងឆេះកញ្ជ្រោលខ្លាំង ដោយមិនអាចគ្រប់គ្រងបានឡើយ។ នេះបើតាមរដ្ឋមន្ត្រីក្រសួងត្រៀមលក្ខណៈសង្គ្រោះបន្ទាន់ លោក Bill Blair និយាយកាលពីថ្ងៃចន្ទ ទី១២ ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Blair បានបញ្ជាក់ក្នុងសន្និសីទសារព័ត៌មានមួយថា “ថ្វីបើភ្លើងឆេះព្រៃនៅកន្លែងខ្លះ មានភាពធូរស្រាលក៏ដោយ ប៉ុន្តែនៅភាគខាងលិច ខេត្តកេបិច និងតំបន់ភាគខាងជើង Ontario នៅតែប្រឈមមុខនឹងការជូនដំណឹងព្រមានអំពីគុណភាពខ្យល់ ដោយសារតែផ្សែងភ្លើងឆេះព្រៃ”។

ស្របពេលជាមួយគ្នានោះដែរ រដ្ឋមន្រ្តីបន្តថា ចំនួនមនុស្សដែលត្រូវជម្លៀសនៅទូទាំងប្រទេសបានកើនឡើងយ៉ាងខ្លាំងពី ២០,១៨៣ នាក់នៅថ្ងៃទី៧ ខែមិថុនា ដល់ទៅជិត ៣២,០០០ នាក់ ។ លោកបានកត់សម្គាល់ទៀតថា ជាមួយនឹងព្រៃឈើទំហំ ៤.៧ លានហិកតាត្រូវបានដុតបំផ្លាញនោះ រដូវភ្លើងឆេះព្រៃឆ្នាំ២០២៣ បានក្លាយជាដូវភ្លើងឆេះព្រៃអាក្រក់បំផុត ក្នុងសតវត្សរ៍ទី២១ ។

ស្របពេលភ្លើងឆេះព្រៃនៅតែបន្តឆាបឆេះទូទាំងប្រទេសកាណាដា, អ្នកពន្លត់អគ្គិភ័យជិត ៥ ពាន់នាក់ ត្រូវបានដាក់ពង្រាយ ហើយក្នុងនោះមានទាំងបុគ្គលិកគ្រប់គ្រងឧប្បត្តិហេតុ អ្នកឯកទេសពីលើអាកាស និងសមាជិកនៃកងកម្លាំងប្រដាប់អាវុធកាណាដា ផងដែរ ។

លោករដ្ឋមន្ត្រីក៏បានកត់សម្គាល់ផងដែរ អំពីវត្តមានរបស់អ្នកពន្លត់អគ្គិភ័យអន្តរជាតិចំនួន ១,០៩៨ នាក់ និងការមកដល់ក្នុងពេលឆាប់ៗ ពីប្រទេសព័រទុយហ្គាល់ និងអេស្ប៉ាញនៅចុងសប្តាហ៍ ដើម្បីជួយដោះស្រាយស្ថានការណ៍ក្នុងខេត្តកេបិច។

គួរបញ្ជាក់ថា កាលពីសប្តាហ៍មុន ផ្សែងពីភ្លើងឆេះព្រៃនៅកាណាដា បានបណ្តាលឲ្យផ្នែកខ្លះនៃភាគខាងកើតសហរដ្ឋអាមេរិក ត្រូវគ្របដណ្តប់ដោយផ្សែងដ៏ក្រាស់ ហើយក្រោយមក ផ្សែងទាំងនោះ ក៏បានរសាត់ទៅលើប្រទេសន័រវេសទៀតផង៕

ប្រែសម្រួល៖ Vann Vann

ប្រភព៖ Sputnik

ចុចអាន៖ ១៦រដ្ឋនៅអាមេរិក គ្របដណ្តប់ដោយផ្សែងពុលគ្រោះថ្នាក់ ខណៈជើងហោះហើររាប់ពាន់ ត្រូវពន្យារពេល