លោក ពូទីន អះអាងថា កងទ័ពអ៊ុយក្រែន ស្លាប់និងរបួសច្រើនជាងរុស្ស៊ី ១០ដង ក្នុងប្រតិបត្តិការវាយបក

ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានអះអាងកាលពីថ្ងៃអង្គារទី១៣ខែមិថុនាថា កងទ័ពស្លាប់ និងរបួសនៅខាងអ៊ុយក្រែន ក្នុងការវាយលុកតបត គឺខ្ពស់ជាងទីក្រុងមូស្គូ១០ដងឯណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយតម្លៃរបស់លោក កើតឡើងប៉ុន្មានម៉ោង បន្ទាប់ពីរុស្ស៊ីអះអាងថា ខ្លួនបានរឹបអូសយករថពាសដែកលោកខាងលិច ពីកងកម្លាំងទីក្រុងកៀវ នៅលើសមរភូមិ។

ក្នុងអំឡុងកិច្ចប្រជុំនៅវិមានក្រឹមឡាំងជាមួយអ្នកកាសែត និងអ្នកសរសេរប្លុករុស្ស៊ីដែលនិយាយអំពីជម្លោះ លោក ពូទីន និយាយថា “ការបាត់បង់នៅខាងអ៊ុយក្រែន កំពុងខិតជិតដល់កម្រិតមួយ ដែលគេអាចណ៌នាថាជាមហន្តរាយហើយ ព្រោះតែយើងមានការខាតបង់តិចជាងនោះ១០ដង”។

ទោះបីជាយ៉ាងណាក៏ដោយ លោក ពូទីន ក៏បានទទួលស្គាល់ដែរថា ស្តុកគ្រឿងសឹកយោធាមួយចំនួនកំពុងធ្លាក់ចុះ ដោយសារតែវាយប្រហារយន្តហោះគ្មានមនុស្សបើក និងមីស៊ីល។

ប៉ុន្តែទីក្រុងកៀវ បានវាយបកទៅវិញភ្លាមៗ ដោយអះអាងថា ប្រតិបត្តិការរបស់អ៊ុយក្រែន ដែលគាំទ្រដោយអាវុធនិងការហ្វឹកហ្វឺនពីលោកខាងលិច កំពុងដំណើរការយ៉ាងរលូន។

ប្រមុខកងកម្លាំងប្រដាប់អាវុធអ៊ុយក្រែន លោក Valery Zaluzhny បាននិយាយនៅលើប្រព័ន្ធផ្សព្វផ្សាយសង្គមថា “ទាំងផ្នែកការពារ និងការវាយលុក កំពុងបន្តនៅភាគខាងកើត និងភាគខាងត្បូងនៃប្រទេសរបស់យើង”។

គួរបញ្ជាក់ថា នារយៈពេល​ប៉ុន្មាន​ថ្ងៃ​ថ្មីៗ​នេះ ទីក្រុង​កៀវ​បាន​អះអាង​ថា​ ដណ្តើម​យក​ភូមិ​ជា​បន្តបន្ទាប់​នៅក្នុង​តំបន់ Donetsk ភាគ​ខាង​កើត៕

ប្រែសម្រួល៖ Vann Vann

ប្រភព៖ CNA

ចុចអាន៖ គីម ជុងអ៊ុន ប្តេជ្ញា ពួតដៃជាមួយ ពូទីន ដើម្បីសម្រេចគោលដៅធំ