លោក Biden និងប្រមុខណាតូ ប្ដេជ្ញារួមគ្នាមិនបោះបង់ចោល អ៊ុយក្រែន

ក្នុងជំនួបនៅឯសេតវិមានកាលពីថ្ងៃអង្គារ ប្រធានាធិបតីសហរដ្ឋអាមេរិកលោក Joe Biden បានប្ដេជ្ញារួមគ្នាជាមួយអគ្គលេខាធិការអង្គការណាតូលោក Jens Stoltenberg អំពីការមិនបោះបង់ចោលអ៊ុយក្រែន ហើយក៏ជាការឆ្លើយតបទៅកាន់លោក វ្ល៉ាឌីមៀរ ពូទីន ផងដែរ ។

មេដឹកនាំទាំងពីរបានផ្តល់សញ្ញាថា ពួកគេនឹងមិនងាករេក្នុងការប្តេជ្ញាចិត្តជួយដល់អ៊ុយក្រែននោះទេ បន្ទាប់ពីលោក ពូទីន បានលើកឡើងថា មធ្យោបាយតែមួយគត់ដើម្បីបញ្ចប់ជម្លោះអ៊ុយក្រែន គឺប្រទេសលោកខាងលិចត្រូវតែបញ្ឈប់ការផ្ដល់អាវុធឲ្យរដ្ឋាភិបាលទីក្រុងកៀវ ។

លោក Biden បាននិយាយថា “យើងកំពុងរួមគ្នាជាមួយអង្គការណាតូ ជាពិសេសជាមួយប្រទេសជាង ៤០ ផ្សេងទៀត ដើម្បីប្ដេជ្ញា ក៏ដូចជានៅពីក្រោយខ្នងចំពោះឯករាជ្យភាពរបស់អ៊ុយក្រែន” ។

ចំណែកលោក Stoltenberg ក៏បានលើកឡើងដែរថា “បច្ចុប្បន្នការគាំទ្រដល់អ៊ុយក្រែនដែលយើងផ្តល់រួមគ្នាជាមួយដៃគូអាមេរិក កំពុងធ្វើឲ្យមានការផ្លាស់ប្តូរនៅលើសមរភូមិប្រយុទ្ធ ពីព្រោះការវាយតបតរបស់អ៊ុយក្រែន បានចាប់ផ្តើមហើយ ហើយក៏កំពុងដំណើរការយ៉ាងរលូនផងដែរ” ។

ជាចុងក្រោយលោក Biden បញ្ជាក់ថា សមាជិកនៃសម្ព័ន្ធភាពលោកខាងលិច ក៏នឹងពង្រឹងសន្ទុះជួយដល់អ៊ុយក្រែនបន្ថែមទៀតផងដែរ នៅពេលពួកគេជួបប្រជុំគ្នាក្នុងទីក្រុងវីលនីញូសរបស់ប្រទេសលីទុយអានី នាថ្ងៃទី១១ ដល់ថ្ងៃទី១២ ខែកក្កដាខាងមុខនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក Biden ពន្យារពេលកិច្ចប្រជុំជាមួយប្រមុខអង្គការ ណាតូ ព្រោះតែ ឈឺធ្មេញ