ព័ត៌មានអន្ដរជាតិ

គីម ជុងអ៊ុន ផ្ញើសារជូនពរថ្ងៃខួបកំណើតលោក ស៊ី ជីនពីង និងសរសើរមេដឹកនាំ ចិន រូបនេះពេញៗមាត់

បានផុស

២ years មុន

នៅ

ថ្ងៃព្រហស្បតិ៍ ១៥ មិថុនា ២០២៣

ដោយ

យោងតាមកាសែត Rodong Sinmun បានរាយការណ៍នៅថ្ងៃព្រហស្បតិ៍នេះថា មេដឹកនាំកូរ៉េខាងជើងលោក គីម ជុងអ៊ុន បានផ្ញើសារតាមបណ្ដាញ Telegram ដើម្បីអបអរសាទរ និងជូនពរដល់ប្រធានាធិបតីចិនលោក ស៊ី ជីនពីង ក្នុងថ្ងៃខួបកំណើតគម្រប់ ៧០ ឆ្នាំ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសារនោះ លោក គីម បានសរសើរដល់លោក ស៊ី ពេញៗមាត់ថា ការដឹកនាំដ៏ខ្លាំងក្លារបស់លោក ស៊ី បានពង្រឹងយ៉ាងខ្លាំងនូវអំណាចជាតិទាំងមូល និងជំហរអន្តរជាតិរបស់ប្រទេសចិន ជាពិសេសសារជូនពរនោះក៏បានសង្កត់ធ្ងន់លើទំនាក់ទំនងមិត្តភាពរបស់ទីក្រុងព្យុងយ៉ាងជាមួយទីក្រុងប៉េកាំងផងដែរ ។

រយៈពេល ៣ ឆ្នាំមកនេះ លោក គីម មិនបានធ្វើដំណើរចេញក្រៅប្រទេសកូរ៉េខាងជើងទេ ចាប់តាំងពីដំណាក់កាលដំបូងនៃជំងឺរាតត្បាតកូវីដ១៩ ក្នុងឆ្នាំ ២០២០ ហើយក្នុងអំឡុងពេលនោះ លោក គីម ក៏មិនបានរៀបចំកិច្ចប្រជុំកំពូលណាមួយជាមួយលោក ស៊ី ផងដែរ ប៉ុន្តែប្រទេសទាំងពីរបាននិងកំពុងពង្រឹងទំនាក់ទំនងមិត្តភាពតាមរយៈការផ្លាស់ប្តូរសារអបអរសាទរតាមបណ្ដាញ Telegram ។

ប៉ុន្មានថ្ងៃមុននេះ លោក គីម ក៏បានផ្ញើសារអបអរសាទរដល់ប្រធានាធិបតីរុស្ស៊ីលោក វ្ល៉ាឌីមៀរ ពូទីន ផងដែរ ក្នុងឱកាសនៃទិវាជាតិរុស្ស៊ីនៅថ្ងៃទី១២ ខែមិថុនា ដោយនៅក្នុងសារនោះ លោក គីម បាននិយាយថា មិត្តភាពរវាងទីក្រុងព្យុងយ៉ាង និងទីក្រុងមូស្គូ គឺជាទ្រព្យសម្បត្តិយុទ្ធសាស្ត្រដ៏មានតម្លៃ ដែលគួរត្រូវបានពង្រឹងបន្ថែមទៀត ។

ពាក់ព័ន្ធនឹងបញ្ហានេះដែរ ក្រុមអ្នកសង្កេតការណ៍បានលើកឡើងថា កូរ៉េខាងជើងទំនងជាកំពុងផ្លាស់ប្តូរឥរិយាបថដើម្បីពង្រឹងទំនាក់ទំនងជាមួយចិន និងរុស្ស៊ី ដើម្បីសម្របសម្រួលផ្នែកសន្តិសុខដែលកំពុងកាន់តែតឹងរ៉ឹង ជាមួយប្រទេសជប៉ុន សហរដ្ឋអាមេរិក និងកូរ៉េខាងត្បូង ៕