ប្រទេសប្រមាណ ២០ ចង់ចូលរួមជាមួយប្លុកដែលមាន រុស្ស៊ី និងចិន

អនុរដ្ឋមន្ត្រីការបរទេសរុស្ស៊ី លោក Sergey Ryabkov បានប្រាប់សារព័ត៌មាន TASS កាលពីថ្ងៃព្រហស្បតិ៍ថា ប្រទេសប្រមាណជា ២០ កំពុងស្វែងរកសមាជិកភាព ក៏ដូចជាចង់ចូលរួមជាមួយក្រុមប្រទេស BRICS ដែលមានមហាអំណាចរុស្ស៊ី និងចិន ។

លោក Ryabkov បាននិយាយថា “បញ្ជីប្រទេសដែលកំពុងចង់ចូលរួមជាមួយសមាគម BRICS របស់យើងកំពុងមានការកើនឡើង ហើយវាក៏ឆ្លុះបញ្ចាំងពីការរីកចម្រើនរបស់ប្លុក និងតួនាទីគួរឲ្យកត់សម្គាល់នៅក្នុងឆាកអន្តរជាតិ ក្នុងនាមជាសមាគមនៃប្រទេសដែលមានមុខតំណែងស្រដៀងគ្នា” ។

អនុរដ្ឋមន្ត្រីការបរទេសរុស្ស៊ីរូបនេះបានលើកឡើងទៀតថា BRICS គឺជាក្រុមនៃបណ្តាប្រទេសដែលមិនអនុវត្តតាមគោលការណ៍មេដឹកនាំពីខាងក្រៅណាមួយឡើយ ប៉ុន្តែទោះយ៉ាងណា ការពិភាក្សាស្ដីពីលក្ខណៈវិនិឆ្ឋ័យសម្រាប់ការចូលរួមជាមួយក្រុមប្រទេស BRICS នេះ អាស្រ័យលើការងាររបស់អាហ្ច្រិកខាងត្បូង ។

លោក Ryabkov បញ្ជាក់ថា “ពិភពអារ៉ាប់ និងតំបន់អាស៊ីប៉ាស៊ីហ្វិក ក៏បាននឹងកំពុងសុំយើងដើម្បីចូលរួមជាមួយ BRICS ផងដែរ ប៉ុន្តែទោះជាយ៉ាងណា​ យើងទុកបញ្ហានេះ​ឲ្យ​ថ្នាក់​ដឹក​នាំប្រទេសជាសមាជិក ធ្វើការ​សម្រេច​ចិត្ត​ក្នុង​កិច្ច​ប្រជុំ​កំពូលនៅ​ទីក្រុង Johannesburg” ។

គួរបញ្ជាក់ថា BRICS គឺជាពាក្យកាត់សម្រាប់តំណាងឲ្យប្រទេសដែលមានសេដ្ឋកិច្ចរីកចម្រើនប្រចាំតំបន់ចំនួន ៥ មានដូចជា ប្រេស៉ីល រុស្ស៉ី ឥណ្ឌា ចិន និងអាហ្វ្រិកខាងត្បូង ។ ចំណែកអាហ្សង់ទីន និងអ៉ីរ៉ង់បានដាក់ពាក្យចូលជាសមាជិករួចហើយ ខណៈ អារ៉ាប៊ីសាអូឌីត តួកគី និងអេហ្ស៉ីប ក៏បានបង្ហាញពីចំណាប់អារម្មណ៍ក្នុងការចូលរួមជាមួយ BRICS ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ គីម ជុងអ៊ុន ផ្ញើសារជូនពរថ្ងៃខួបកំណើតលោក ស៊ី ជីនពីង និងសរសើរ មេដឹកនាំ ចិន រូបនេះពេញៗមាត់