ណាតូ ដាក់ចេញផែនការងាយៗសម្រាប់ អ៊ុយក្រែន ចូលជាសមាជិក

សម្ព័ន្ធមិត្តរបស់អង្គការណាតូកំពុងពិចារណាផែនការដែលអាចធ្វើឲ្យអ៊ុយក្រែនកាន់តែងាយស្រួល ក្នុងការចូលជាសមាជិកជាមួយសម្ព័ន្ធភាពយោធាមួយនេះ ដោយមិនចាំបាច់ប្រកាន់ខ្ជាប់នូវផែនការសកម្មភាពសមាជិកភាព (MAP) ឡើយ ហើយសំណើនេះក៏អាចក្លាយជាផ្លូវការផងដែរ ក្នុងអំឡុងពេលកិច្ចប្រជុំកំពូលរបស់ណាតូនៅប្រទេសលីទុយអានី ។

គំនិត​ដែល​ត្រូវ​បាន​ដាក់​ចេញ​ដោយ​អគ្គលេខាធិការ​អង្គការ​ណាតូ លោក Jens Stoltenberg បានបង្ហាញថា សម្ព័ន្ធមិត្តយល់ព្រមអនុញ្ញាតឲ្យអ៊ុយក្រែនចូលជាសមាជិកអង្គការណាតូ ដោយមិនចាំបាច់ប្រកាន់ខ្ជាប់នូវផែនការ MAP ដែលរួមមានកំណែទម្រង់អភិបាលកិច្ចយោធា និងលទ្ធិប្រជាធិបតេយ្យជាហូរហែ ដែលប្រទេសបេក្ខជនត្រូវតែបំពេញ មុនពេលចូលជាសមាជិកឡើយ ។

ទោះជាយ៉ាងណា ការដកចេញផែនការ MAP ចេញនេះ នឹងគ្រាន់តែបង្កើនល្បឿនក្នុងការប៉ុនប៉ងរបស់អ៊ុយក្រែនដើម្បីក្លាយជាសម្ព័ន្ធភាពនេះប៉ុណ្ណោះ ហើយមិនផ្តល់ការធានាណាមួយថា រដ្ឋាភិបាលទីក្រុងកៀវនឹងទទួលបានការយល់ព្រមជាឯកច្ឆ័ន្ទសម្រាប់សមាជិកភាពនេះនោះទេ ។

ម្យ៉ាងទៀត មិនមែនរដ្ឋជាសមាជិកអង្គការណាតូទាំងអស់សុទ្ធតែមានភាពវិជ្ជមាន ចំពោះផែនការដែលបានស្នើឡើងនេះនោះទេ ដោយសារពួកគេបារម្ភថា ការដកផែនការ MAP សម្រាប់អ៊ុយក្រែន នឹងធ្វើឲ្យរុស្ស៊ីក្ដៅស្លឹកត្រចៀក និងពង្រីកជម្លោះកាន់តែធំឡើងៗផងដែរ ។

ទន្ទឹមនោះ មតិមួយចំនួនក៏បានលើកឡើងស្រដៀងគ្នាពីបញ្ហានៃការប្រើប្រាស់នៃវិធានការបែបនេះផងដែរ ព្រោះវាប្រហែលជាមិនអាចធ្វើអ្វីបានជាក់ស្តែងសម្រាប់អ៊ុយក្រែននោះទេ ខណៈដែលមតិផ្សេងទៀតបានសម្តែងការព្រួយបារម្ភថា ការចូលជាសមាជិកអង្គការណាតូរបស់អ៊ុយក្រែន អាចមានគ្រោះថ្នាក់ ព្រោះវានឹងជំរុញឲ្យរុស្ស៊ីចូលរួមក្នុងជម្លោះដើម្បីមកការពារអ៊ុយក្រែនមិនឲ្យក្លាយជាសមាជិកសម្ព័ន្ធភាពយោធាមួយនេះឡើយ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ពូទីន ព្រមានថា ណាតូ នឹងមានសង្គ្រាមបើកចំហជាមួយរុស្ស៊ី បើអ៊ុយក្រែន ទទួលបានយន្តហោះចម្បាំង F-16