ពលរដ្ឋភូមា ជិត៤ពាន់នាក់ ភៀសខ្លួនចូលទឹក​ដីថៃ បន្ទាប់ពីមានការប្រយុទ្ធគ្នាជិត១សប្តាហ៍

ប្រមាណជា១សប្តាហ៍ហើយដែលកងទ័ពពិសេសភូមា បានប៉ះទង្គិចគ្នាជាមួយក្រុមប្រដាប់អាវុធ ការៀង នៅក្បែរព្រំដែនថៃ ធ្វើអោយប្រជាជនភូមា ចាំបាច់ត្រូវភៀសខ្លួនចូលមកកាន់ទឹកដីថៃជាបណ្តោះអាសន្ន ដើម្បីគេចពីគ្រាប់កាំភ្លើង រកកន្លែងសុវត្ថិភាព ។

ការផ្ទុះអាវុធតបតគ្នា និងសម្លេងគ្រាប់បែកនៃការទម្លាក់ពីយន្តហោះ បានលាន់ឮឡើង និងអូសបន្លាយពេលប្រមាណ​១សប្តាហ៍មកហើយ នៅក្នុងភូមិសាស្ត្រស្រុកម៉ែចេ: ខេត្តម៉ែចេ: ប្រទេសភូមា ដែលមានចម្ងាយប្រមាណពី ៨ ទៅ ១០ គីឡូម៉ែត្រ ពីខ្សែបន្ទាត់ព្រំដែនថៃ ត្រង់ចំណុចព្រំប្រទល់ខេត្ត ម៉ែហង់សន ប្រទេសថៃ។

ការប្រយុទ្ធគ្នាដ៏ស្វិតស្វាញនេះ គឺរវាងកងកម្លាំងយោធាពិសេសរបស់ភូមា លេខ៤៣០ ជាមួយកងកម្លាំងជនជាតិភាគតិច (កងទ័ពព្រៃ ការៀង) (KAKNDS) ដែលរស់នៅក្នុងព្រៃតាមខ្សែបន្ទាត់ព្រំដែនថៃ ភូមា ធ្វើអោយប្រជាជនភូមា ដែលរស់នៅក្នុងតំបន់សង្គ្រាមនោះត្រូវភៀសខ្លួនចូលមកកាន់ទឹកដីថៃ តាមច្រកចំនួនពីរ ក្នុងខេត្តម៉ែហង់សន ។

តាមរបាយការណ៍របស់អាជ្ញាធរថៃ បានបញ្ជាក់ថា ប៉ុន្មានថ្ងៃកន្លងមកនេះ ពិសេសគឺការប៉ះទង្គិចគ្នាខ្លាំងកាលពីថ្ងៃទី១៨ ម្សិលមិញនេះ មានជនភៀសខ្លួនសរុបចំនួន ៣៨៧១ នាក់ហើយ ដែលបានធ្វើដំណើរចូលមកប្រទេសថៃ ហើយក៏អាចនៅមានបន្តទៀត ដើម្បីរកកន្លែងសុវត្ថិភាពបណ្តោះអាសន្ន ដោយអាជ្ញាធរថៃបានជួយឧបត្ថម្ភនូវអង្ករ និងគ្រឿងឧបភោគ បរិភោគ រាល់ថ្ងៃ ៕

អត្ថបទ៖ សោ និយមរ័ត្ន