សមាជិកអាស៊ានសំខាន់ៗ មិនចូលរួមកិច្ចពិភាក្សាមីយ៉ាន់ម៉ា ដែលរៀបចំដោយ ថៃ

រដ្ឋាភិបាលចាំផ្ទះរបស់ប្រទេសថៃ បានរៀបចំធ្វើជាម្ចាស់ផ្ទះនៃកិច្ចពិភាក្សាជាមួយរដ្ឋមន្ត្រីការបរទេសមីយ៉ាន់ម៉ា នៅថ្ងៃចន្ទទី១៩ខែមិថុនានេះ ពោលគឺមួយថ្ងៃក្រោយការគ្រោងទុក ខណៈប្រទេសអាស៊ានសំខាន់ៗដូចជា សិង្ហបុរី ម៉ាឡេស៊ី និងហ្វីលីពីន បានប្រកាសថានឹងមិនចូលរួមឡើយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុងបាងកក បាននិងកំពុងជំរុញ ឲ្យមានទំនាក់ទំនងឡើងវិញជាមួយមេទ័ពមីយ៉ាន់ម៉ា ចំពេលប្រឈមមុខនឹងការប្រឆាំងពីសមាជិកដទៃទៀត នៃសមាគមប្រជាជាតិអាស៊ីអាគ្នេយ៍ ដែល​រារាំង​យោធា​ពី​កិច្ច​ប្រជុំ​ថ្នាក់​ខ្ពស់​។

ប្រទេសថៃ ដែលនាយករដ្ឋមន្ត្រីខ្លួនឯងឡើងកាន់អំណាចដំបូងក្នុងរដ្ឋប្រហារដែរនោះ បានផ្ញើលិខិតទៅកាន់រដ្ឋមន្ត្រីការបរទេសអាស៊ាន ដោយអញ្ជើញឲ្យចូលរួមក្នុងកិច្ចប្រជុំក្រៅផ្លូវការ ចាប់ផ្តើមនៅថ្ងៃអាទិត្យ ។

ស្របពេលជាមួយគ្នានោះ ប្រភពពីរបានប្រាប់ Reuters ថា រដ្ឋមន្ត្រីការបរទេសដែលត្រូវបានតែងតាំងដោយយោធាមីយ៉ាន់ម៉ាគឺលោក Than Swe នឹងចូលរួមកិច្ចពិភាក្សានេះ។

ប៉ុន្តែកាលពីល្ងាចថ្ងៃអាទិត្យ ក្រសួងការបរទេសថៃ បានចេញសេចក្តីថ្លែងការណ៍មួយថា “កិច្ចសន្ទនាក្រៅផ្លូវការ” នឹងចាប់ផ្តើមនៅថ្ងៃចន្ទវិញ។ ក្រសួងអះអាងថា វានឹងមិនដូចកិច្ចប្រជុំអាស៊ានផ្លូវការនោះទេ ប៉ុន្តែនឹងជួយគាំទ្រដល់កិច្ចខិតខំប្រឹងប្រែងរបស់អាស៊ាន ដើម្បីបញ្ចប់អំពើហិង្សានៅមីយ៉ាន់ម៉ា។

គួរបញ្ជាក់ថា ក្រុមឧត្តមសេនីយ៍មីយ៉ាន់ម៉ា ត្រូវបានរារាំងពីកិច្ចប្រជុំអាស៊ានកម្រិតខ្ពស់អស់រយៈពេលជិត ២ ឆ្នាំមកហើយ ដោយសារតែខកខានមិនបានគោរពតាមកិច្ចព្រមព្រៀងសន្តិភាព៕

ប្រែសម្រួល៖ Vann Vann

ប្រភព៖ CNA

ចុចអាន៖ រដ្ឋមន្ត្រីការបរទេស មីយ៉ាន់ម៉ា នឹងចូលរួមកិច្ចពិភាក្សាដោះស្រាយវិបត្តិក្រៅ ផ្លូវការនៅ ថៃ