ចិន ឲ្យអាមេរិក ជ្រើសរើសទៅ ថាតើ យកកិច្ចសហប្រតិបត្តិការ ឬជម្លោះ

ប្រទេសចិន និងសហរដ្ឋអាមេរិក ត្រូវតែជ្រើសរើសរវាងកិច្ចសហប្រតិបត្តិការ ឬជម្លោះ។ នេះបើតាមការបញ្ជាក់ ពីអ្នកការទូតកំពូលចិន ទៅកាន់រដ្ឋមន្ត្រីការបរទេសអាមេរិកលោក Antony Blinken នៅថ្ងៃចន្ទទី១៩ខែមិថុនា ដែលជាថ្ងៃចុងក្រោយនៃដំណើរទស្សនកិច្ចរបស់លោក ក្នុងគោលបំណងធ្វើទំនាក់ទំនងរវាងទីក្រុងប៉េកាំងនិងវ៉ាស៊ីនតោន ប្រសើរឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Blinken និងមន្ត្រីគោលនយោបាយការបរទេសជាន់ខ្ពស់បំផុតរបស់ចិន គឺលោក Wang Yi បានជួបពិភាក្សាគ្នារយៈពេលបីម៉ោងនៅថ្ងៃចន្ទ ក្នុងវិមានរដ្ឋ Diaoyutai។

លោក Wang បានប្រាប់ទៅលោក Blinken ថា “ដំណើរទស្សនកិច្ចរបស់រដ្ឋមន្ត្រីការបរទេសអាមេរិក មកកាន់ទីក្រុងប៉េកាំងនាពេលនេះ គឺកើតឡើងចំពេលទំនាក់ទំនងចិន-អាមេរិក កំពុងស្ថិតក្នុងចំណុចប្រសព្វដ៏សំខាន់មួយ។ វា​ចាំបាច់​ក្នុង​ការ​​ជ្រើសរើស​រវាងកិច្ច​សន្ទនា​និង​ការ​ប្រឈមមុខ​ដាក់​គ្នា ឬរវាងកិច្ចសហប្រតិបត្តិការ និង​ជម្លោះ”​។

លោក Wang បន្ថែមថា “យើងត្រូវតែស្តារទំនាក់ទំនងចិន-អាមេរិកដែលកំពុងដាំក្បាលចុះ ជំរុញឲ្យមានការវិលត្រលប់ទៅរកផ្លូវដែលមានស្ថិរភាព ហើយធ្វើការរួមគ្នាដើម្បីស្វែងរកវិធីត្រឹមត្រូវសម្រាប់ប្រទេសចិន និងសហរដ្ឋអាមេរិកដើម្បីរួបរួមគ្នា”។

ស្របពេលជាមួយគ្នានោះ លោក​ក៏​បាន​ចេញ​ការ​ព្រមាន​លើបញ្ហា​កោះ​តៃវ៉ាន់ផងដែរ ដោយកាលពីឆ្នាំមុន ប្រទេសចិនបានធ្វើសមយុទ្ធយោធាបាញ់គ្រាប់ពិតពីរដងនៅជិតកោះនេះ ដោយខឹងសម្បាចំពោះសកម្មភាពរបស់សមាជិកសភាកំពូលអាមេរិក។

លោក Wang បានប្រាប់ Blinken ថា “លើបញ្ហានេះ ប្រទេសចិនមិនមានកន្លែងណាមួយដើម្បីសម្របសម្រួល ឬយល់ព្រមទេ។ សហរដ្ឋអាមេរិក ត្រូវតែប្រកាន់ខ្ជាប់យ៉ាងពិតប្រាកដនូវគោលការណ៍ចិនតែមួយ ដែលបានបញ្ជាក់នៅក្នុងសេចក្តីថ្លែងការណ៍រួមទាំងបី រវាងសហរដ្ឋអាមេរិកនិងចិន ហើយត្រូវគោរពអធិបតេយ្យនិងបូរណភាពទឹកដីរបស់ប្រទេសចិន និងប្រឆាំងចំពោះឯករាជ្យភាពតៃវ៉ាន់”៕

ប្រែសម្រួល៖ Vann Vann

ប្រភព៖ CNA

ចុចអាន៖ លោក Blinken និយាយដោយឥតលាក់លៀម ក្នុងកិច្ចពិភាក្សាជាមួយសមភាគី ចិន