នាវាមុជទឹក នាំអ្នកទេសចរទៅមើលខ្មោចកប៉ាល់ Titanic កំពុងបាត់ខ្លួន ខណៈអុកស៊ីសែន នៅសល់ត្រឹម៦០ម៉ោង

នាវាមុជទឹកមួយគ្រឿងដឹកអ្នកទេសចរចំនួន៥នាក់ បានបាត់ខ្លួននៅក្បែរខ្មោចកប៉ាល់ Titanic ហើយប្រតិបត្តិការស្វែងរកកំពុងធ្វើឡើងដើម្បីជួយសង្គ្រោះពួកគេ ខណៈអុកស៊ីសែន នៅសល់ត្រឹម៦០ម៉ោងទៀតប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្មាំសមុទ្រអាមេរិកបានប្រាប់ BBC កាលពីថ្ងៃចន្ទទី១៩ខែមិថុនាថា ប្រតិបត្តិការស្វែងរក និងជួយសង្គ្រោះកំពុងធ្វើឡើងនៅមហាសមុទ្រអាត្លង់ទិកខាងជើង។

ពួកគេនិយាយថា ពួកគេបាត់បង់ការទាក់ទងជាមួយនាវាមុជទឹកខ្នាតតូចមួយគ្រឿងនេះ ប្រហែលមួយម៉ោង និង ៤៥នាទី ពេលវាចេញដំណើរ។

ស្របពេលជាមួយគ្នានោះ ក្រុមហ៊ុន OceanGate ដែលរៀបចំដំណើរទេសចរណ៍នេះ បាននិយាយនៅក្នុងសេចក្តីថ្លែងការណ៍មួយថា “យើងកំពុងស្វែងរក និងគិតគូរលើជម្រើសទាំងអស់ ដើម្បីនាំនាវិកត្រលប់មកវិញដោយសុវត្ថិភាព។ ពេលនេះ យើងកំពុងគិតជាចម្បងទៅលើសមាជិកនាវិកនៅក្នុងនាវាមុជទឹក និងក្រុមគ្រួសាររបស់ពួកគេ”។

សម្រាប់ដំណើរកម្សាន្តរយៈពេលប្រាំបីថ្ងៃនេះ អ្នកទេសចរម្នាក់ត្រូវទិញសំបុត្រតម្លៃ ២៥ ម៉ឺនដុល្លារ ដោយក្នុងនោះ បូករួមទាំងការជ្រមុជទឹកទៅកាន់ខ្មោចកប៉ាល់ Titanic នៅជម្រៅ ៣,៨០០ ម៉ែត្រផងដែរ ។

គួរបញ្ជាក់ថា កប៉ាល់ Titanic បានលិចបន្ទាប់ពីបុកផ្ទាំងទឹកកក អំឡុងពេលធ្វើដំណើរចេញពីចក្រភពអង់គ្លេស ទៅកាន់សហរដ្ឋអាមេរិកក្នុងខែមេសា ឆ្នាំ១៩១២។ អ្នកដំណើរ និងនាវិកជាង ១៥០០នាក់ ក្នុងចំណោម២២០០នាក់ បានស្លាប់នៅក្នុងគ្រោះមហន្តរាយនោះ។

បំណែក​នៃ​កប៉ាល់ ​ត្រូវ​បាន​គេ​រក​ឃើញ​ក្នុង​ឆ្នាំ១៩៨៥ នៅចម្ងាយ​ប្រហែល៦០០គីឡូម៉ែត្រ​ពី​ឆ្នេរ Newfoundland នៃប្រទេស​កាណាដា និងនៅជម្រៅ​ប្រហែល ៣៨០០ ម៉ែត្រ​​ក្រោម​សមុទ្រ៕

ប្រែសម្រួល៖ Vann Vann

ប្រភព៖ BBC, RT

ចុចអាន៖ James Cameron ចេញមកបញ្ជាក់ច្បាស់ពីការស្លាប់តួអង្គ Jack ក្នុងរឿង Titanic