ព័ត៌មានអន្ដរជាតិ

លោក Blinken ចាកចេញពី ចិន ដោយមិនមានកិច្ចព្រមព្រៀងបន្តទំនាក់ទំនងយោធារវាងប្រទេសទាំងពីរ

បានផុស

២ years មុន

នៅ

ថ្ងៃអង្គារ ២០ មិថុនា ២០២៣

ដោយ

រដ្ឋមន្ត្រីការបរទេសអាមេរិក លោក Antony Blinken បានចាកចេញពីប្រទេសចិនហើយ បន្ទាប់ពីជួបជាមួយមេដឹកនាំកំពូលៗរបស់ប្រទេស ខណៈក្នុងអំឡុងពេលនៃកិច្ចពិភាក្សាជាបន្តបន្ទាប់នោះ សហរដ្ឋអាមេរិក និងចិនបានបញ្ជាក់ថានឹងបន្តកិច្ចសន្ទនា ប៉ុន្តែបរាជ័យក្នុងការឈានដល់កិច្ចព្រមព្រៀងស្តីពីការបន្តបណ្តាញទំនាក់ទំនងរវាងយោធារបស់ប្រទេសទាំងពីរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទាក់ទងនឹងសំណើដើម្បីបន្តបណ្តាញទំនាក់ទំនងយោធាទៅយោធា ដែលក្រុងវ៉ាស៊ីនតោនចាត់ទុកថា មានសារៈសំខាន់ក្នុងការចៀសវាងការប៉ះទង្គិចគ្នាដោយអចេតនានោះ, លោក Blinken បានលើកឡើងថា ប្រទេសចិនមិនយល់ព្រមក្នុងការដោះស្រាយបញ្ហានេះនោះទេ ។

ពាក់ព័ន្ធនឹងបញ្ហានេះដែរ លោក Xi បានប្រាប់លោក Blinken វិញថា “ទីក្រុងប៉េកាំងសង្ឃឹមនឹងឃើញទំនាក់ទំនងចិន និងអាមេរិករឹងមាំ” ហើយលោកជឿថា “ប្រទេសមហាអំណាចទាំងពីរអាចជម្នះរាល់ការលំបាកផ្សេងៗ និងស្វែងរកផ្លូវត្រឹមត្រូវដើម្បីធ្វើការរួមគ្នាផងដែរ” ។

ថ្លែងទៅកាន់អ្នកសារព័ត៌មាន លោក Blinken បានទទួលស្គាល់ថា “មានបញ្ហាស៊ីជម្រៅជាច្រើនដែលសហរដ្ឋអាមេរិក និងចិនមិនយល់ស្របគ្នា ។ ប៉ុន្តែលោកបានសង្កត់ធ្ងន់ថា ក្រុងវ៉ាស៊ីនតោន និងក្រុងប៉េកាំងទទួលស្គាល់ពីតម្រូវការក្នុងការរក្សាស្ថិរភាពទំនាក់ទំនងទ្វេភាគី” ។

ក្នុងអំឡុងពេលស្នាក់នៅរបស់លោក Blinken ក្នុងប្រទេសចិន ភាគីទាំងពីរបានសន្យានឹងបន្តការសន្ទនា ហើយបានយល់ព្រមរៀបចំដំណើរទស្សនកិច្ចរបស់លោករដ្ឋមន្ត្រីការបរទេស Qin Gang ទៅកាន់ទីក្រុងវ៉ាស៊ីនតោនក្នុងពេលវេលាសមស្របណាមួយផងដែរ ។

គួរបញ្ជាក់ថា កាលពីថ្ងៃចន្ទ លោក Blinken បានបញ្ចប់ដំណើរទស្សនកិច្ចរយៈពេល ២ ថ្ងៃរបស់លោកទៅកាន់ប្រទេសចិន ហើយក្នុងអំឡុងពេលនោះ លោក Blinken បានជួបជាមួយរដ្ឋមន្ត្រីការបរទេសចិនលោក Qin Gang, អ្នកការទូតកំពូលលោក Wang Yi និងលោកប្រធានាធិបតី Xi Jinping ផងដែរ ហើយរដ្ឋមន្ត្រីការបរទេសអាមេរិករូបនេះ គឺជាសមាជិកទីមួយនៃរដ្ឋបាលរបស់លោកប្រធានាធិបតី Joe Biden ដែលមកបំពេញទស្សនកិច្ចនៅប្រទេសចិនក្នុងរយៈពេលជិត ៥ ឆ្នាំមកនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អនាគតមនុស្សជាតិ គឺអាស្រ័យលើ ទំនាក់ទំនងចិន-អាមេរិក