លោក បៃដិន ព្រមានថា រុស្ស៊ី អាចបាញ់នុយក្លេអ៊ែរ មែន

ប្រធានាធិបតីអាមេរិកលោក ចូ បៃដិន អះអាងថា មានការគំរាមកំហែងពិតប្រាកដមែន ដែលថា រុស្ស៊ីនឹងប្រើប្រាស់អាវុធនុយក្លេអ៊ែរយុទ្ធសាស្ត្រ បន្ទាប់ពីវិមានក្រឹមឡាំងប្រកាសថា ខ្លួនបានដាក់អាវុធមួយចំនួននៅលើទឹកដីនៃសម្ព័ន្ធមិត្តជិតបំផុតរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់ក្រុមអ្នកផ្តល់ជំនួយក្នុងរដ្ឋកាលីហ្វ័រញ៉ា កាលពីថ្ងៃចន្ទទី១៩ខែមិថុនា លោក បៃដិន លើកឡើងថា ការចល័តនុយក្លេអ៊ែររបស់រុស្ស៊ីនៅបេឡារុស អាចជាសញ្ញាមួយដែលថា ខ្លួនកំពុងរៀបចំប្រើប្រាស់នុយក្លេអ៊ែរ ថ្វីបើថ្មីៗនេះសេតវិមាន បានបដិសេធអំពីលទ្ធភាពបែបនេះក៏ដោយ។

លោកនិយាយថា “នៅពេលខ្ញុំនិយាយចេញពីទីនេះប្រហែល២ឆ្នាំមុនថា ខ្ញុំព្រួយបារម្ភអំពីទន្លេ Colorado រីងស្ងួត មនុស្សគ្រប់គ្នាមើលមកខ្ញុំថា ដូចជាមនុស្សឆ្កួត។ ពួកគេមើលមកខ្ញុំនៅពេលខ្ញុំនិយាយថា ខ្ញុំបារម្ភអំពីប្រធានាធិបតីរុស្ស៊ី លោក វ្ល៉ាឌីមៀរ ពូទីន ប្រើអាវុធនុយក្លេអ៊ែរយុទ្ធសាស្ត្រ។ នេះជាការពិត”។

ការ​ថ្លែង​នេះកើត​ឡើង ​បន្ទាប់​ពី​លោក ចូ បៃដិន ​ថ្កោល​ទោស​ការ​ដាក់​ពង្រាយ​របស់​រុស្ស៊ី​ថា​ ជាទង្វើគ្មានទំនួលខុស​ត្រូវ​ទាំង​ស្រុង។

គួរបញ្ជាក់ជាថ្មី ទីក្រុងមូស្គូនិងទីក្រុងមីនស្កិ៍ បានសម្រេចកិច្ចព្រមព្រៀង​ ស្តីពីការដាក់អាវុធនុយក្លេអ៊ែរយុទ្ធសាស្ត្រនៅលើទឹកដីបេឡារុសកាលពីខែមុន។

យោងតាមរដ្ឋមន្ត្រីការពារជាតិរុស្ស៊ី លោក Sergey Shoigu, ក្បាលគ្រាប់បរមាណូ នឹងត្រូវបានបំពាក់នៅលើមីស៊ីល Iskander-M និងយន្តហោះចម្បាំង ដែលត្រូវបានកែប្រែជាពិសេសសម្រាប់គោលបំណងនេះ៕

ប្រែសម្រួល៖ Vann Vann

ប្រភព៖ RT

ចុចអាន៖ លក្ខខណ្ឌតែមួយគត់ ដែលរុស្ស៊ី នឹងដកអាវុធនុយក្លេអ៊ែរ ចេញពីបេឡារុស